Нұр-Сұлтандағы әлем чемпионатының басталуына 5 күн қалды, — деп хабарлайды Tarazy.kz.
Нұр-Сұлтан қаласындағы күрес түрлерінен әлем чемпионатының басталуына бар болғаны бес күн қалды. Грек-рим, еркін және әйелдер күресі бойынша әрқайсысы 10 салмақ дәрежесінде 30 медаль жиынтығы жүлдеге тігілетін байрақты бәсекеге кіл мықтылар келе жатыр.
Қыркүйектің 14-22-сі аралығында жалауы желбірейтін бұл сында Қазақстан құрамасының палуандары барлық салмақ дәрежесінде боз кілемге шығады. Өз жерімізде өткелі отырған әлем чемпионатында мамандар олардың арасынан грек-рим күресі бойынша Алмат Кебісбаев, Асхат Ділмұхамедов, Мейрамбек Айнағұлов, Мейіржан Шермаханбеттер жүлдеге қол жеткізеді деп жорамалдаса, еркін күрестен Нұрислам Санаев, Нұрқожа Қайпанов, Әлішер Ерғали, Данияр Қайсанов, Расул Қалиев, Дәулет Ниязбековтерден жүлде күтеді. Ал әйелдер күресі бойынша құрама басшылығы 10-ының біреуі жүлдеге ілінсе деген мақсат қойыпты.
Нұр-Сұлтандағы әлем чемпионатында барша күрес жанкүйерлері еркін күрестен 97 келідегі ресейлік әйгілі Абдулрашид Садуллаев пен атақты АҚШ палуаны Кайл Снайдер арасындағы үшінші белдесудің болатынын болжап, сол сәтті асыға күтіп жүр. Бұған дейін бұл екі палуан арасындағы өзара есеп 1:1. Бұл салмақта Қазақстан атынан жерлесіміз, құландық жиырма жасар Әлішер Ерғали өнер көрсететінін айта кетейік. Бұл ретте жас пері Әлішердің жуырда халықаралық турнирде топ жарғанын ескеріп, Нұр-Сұлтан боз кілемінен кемі қола жүлде күтуге болады деп топшылаймыз.
Нұр-Сұлтандағы әлем чемпионатында Қазақстан атынан мына палуандар белдесетін болады:
Грек-рим күресі
55 келі Қорлан Жақанша
60 келі Мейрамбек Айнағұлов
63 келі Алмат Кебісбаев
67 келі Мейіржан Шермаханбет
72 келі Демеу Жадыраев
77 келі Асхат Ділмұхамедов
82 келі Мақсат Ережепов
87 келі Азамат Кұстыбаев
97 келі Ерұлан Ысқақов
130 келі Дамир Күзембаев
Еркін күрес құрамасы
57 келі Нұрислам Санаев
61 келі Расул Қалиев
65 келі Дәулет Ниязбеков
70 келі Нұрқожа Қайпанов
74 келі Данияр Қайсанов
79 келі Ғалымжан Өсербаев
86 келі Әділет Дауланбаев
92 келі Нұрғали Нұрғайыпұлы
97 келі Әлішер Ерғали
125 келі Олег Болтин
Әйелдер күресі құрамасы
50 келі Валентина Исламова
53 келі Татьяна Ахметова
55 келі Марина Седнева
57 келі Эмма Тисина
59 келі Мәдина Бақбергенова
62 келі Аяулым Қасымова
65 келі Айна Теміртасова
68 келі Ирина Казюлина
72 келі Жәмилә Бақбергенова
76 келі Эльмира Сыздықова
