Алматы облысының Қарасай ауданында орналасқан «Ерекшем» оңалту орталығы ерекше балаларға арнап мекерелік думан ұйымдастырды. Елімізде қазан айының екінші жексенбісі мүмкіндігі шектеулі жандар күні болып белгіленген. Ерекше балаларға арналған арнайы орталық есігін айқара ашып, бүлдіршіндерге қуаныш сыйлады, деп хабарлайды Tarazy ақпарат.
Ашылғанына 1 жыл енді толған «Ерекшем» оңалту орталығы Абай ауылында орналасқан. Мекеменің ашуға тер төккен Қаршыға Амантаева да ерекше баланың анасы. Перзенті үшін оңалту орталығын іздеп, қолайлысын таппаған ана қолдауды қажет ететін балалардың көптігіне көзі жетіпті. Ауыр диагнозбен туған балалар үшін оңалту орталығын ашуды Қаршыға Амантаева өзі қолға алған.
«Барлықтарыңызды ерекше балапандар мерекесімен құттықтаймын. Ең алғаш ашылғанда осы орталық киелі шаңырақ болса екен, балалар аяққа тұратын, балаларға шипа беретін орталық болса екен деп тіледім. Алғашқы жемісін көріп жатырмыз. Әр таңды атырамын үмітпенен, бәрі жақсы болар деп үміттенем» деп жүрген ата-аналарға тұсаукесерлер мен жақсы нәтижелер жұғысты болсын. Ең бастысы, бізді үнемі қолдап жүретін Respublica партиясы мен оның кәсіпкер азаматтарына алғыс білдіремін» — деді Қаршыға Амантаева.
Аталған орталық бүгінде 40 балаға тегін қызмет көрсетеді. Мекемеде еңбек ететін мамандар мен дәрігерлер өз істеріне жан-тәнімен берілген жігерлі жандар. Жүйелі жұмыс пен табандылықтың арқасында 1 жыл бұрын «Ерекшем» орталығына келген ауыр диагнозды, жүре алмайтын балалар бүгінде қадам басыпты. Мерекелік салтанатқа келген қонақтар тұсаукесер рәсіміне куә болды. Орталыққа үнемі қамқорлық көрсетіп жүрген кәсіпкер Керімжан Үрістем мырза бүлдіршіндерге сәттілік тіледі.
«Балалар қиналмау керек, қазақ қоғамы мейірімге толы болса екен дейміз. Әркім өсіріп отырған ұл-қызын тым болмағанда қоғамға пайдасы болмаса да, зияны болмайтындай тәрбие берсек екен. Осындай орталықтарға қамқорлықты, қайырымдылықты мақтан үшін немесе атақ шығару үшін жасамаймыз. Әр азамат, әр кәсіпкер өзінің әлеуметтік жауапкершілігін сезіну керек. Бала — біздің болашағымыз. Оларға қамқорлық керек. Ендеше ерекше бүлдіршіндерге одан да көп мейірім төгу керек. Баршаңызға төзімділік пен сәттілік тілеймін», — деді кәсіпкер азамат.
Керімжан Үрістем Respublica партиясының белсенді мүшесі, партияның Алматы қаласы бойынша аймақтық кеңес мүшесі ретінде талай игі істердің басында жүр. Кәсіпкер азамат бүгінгі мерекелік күнге орай «Ерекшем» орталығына құны 1,2 миллион теңге тұратын құрылғыны сыйға тартты. Respublica партиясының мүшелері мен кәсіпкерлері аталған мекемеге қолдау көрсетуді бұдан кейін де жалғастыра бермек.
