Меккеде қажылық парызын өтеу барысында жүздеген адам қаза болды. Қазақстаннан қажылаққа аттанған отандастар дін аман. Бұл туралы Қазақстан мұсылмандары діни басқармасының өкілі Ағабек Қонарбай мәлімдеді, деп хабарлайды Tarazy ақпарат.
Жыл сайын қажылық кезінде мүфтият қажылық миссия құрамын жасақтап, Сауд Арабиясына бірге аттандырады. Оның құрамында дәрігерлер, БАҚ өкілдері, уағызшылар мен дінтанушылар болады.
«Қазақстан қажылық миссиясы қасиетті Мекке жерінде ұлы сапарға келген отандастарымыздың дін аман екенін хабарлайды», – деп жазды Ағабек Қонарбай.
Қажылық миссиядағы дәрігерлер тобына жетекшілік ететін Ардақ Айтбайұлының айтуынша, медициналық орталыққа 14-16 маусым күндері 703 қажы жүгінген. Олардың көбі жүрек, қантамырлары, жоғары және төменгі тыныс жолдары және асқазан-ішек ауруларына шағым айтқан.
Бұған дейін ақпарат құралдарында Меккедегі ыстықтан бірнеше адам қаза тапқаны туралы хабарланған. Осы орайда Қазақстан қажыларының арасында қайтыс болған ешкім жоқ. Сондай-ақ, Қазақстан қажылық миссиясының құрамында 4 дәрігер және 16 қажылық компанияның әрқайсында 1 дәрігерден, барлығы 20 білікті медицина маманы ем-шара жұмыстарымен айналысуда.
Айта кетейік, 17 маусымда Меккедегі Әл-Харам мешітінде ауа температурасы 51,8 градусқа жеткен. Биылғы қажылық 14-19 маусым аралығында өтеледі. Сауд Арабиясына қажылық кезінде қаза тапқан қажылардың жалпы саны 577-ге жеткен. AFP хабарлауынша, олардың 323-і мысырлық, барлығы аптап ыстықтан қайтыс болды, тек бір адам жарақаттан көз жұмды. Қаза тапқандардың 60-қа жуығы иорданиялық.