Қазақстан билігі Алматы облысында жол жөндеу жұмыстарын орындамаған түрік мердігері F&A Road Construction компаниясынан 5,9 миллиард теңгені сот арқылы қайтарып алды, деп хабарлайды Tarazy ақпарат.
Әділет министрлігінің баспасөз қызметінің хабарлауынша, 2021 жылы Көлік министрлігінің автомобиль жолдары комитеті түрік компаниясымен Күрті — Бурылбайтал тас жолын жөндеуге келісімшарт жасаған. Мердігерге 5,9 миллиард теңге аванс ретінде төленген, бірақ компания жөндеу жұмыстарын бастамаған. 2022 жылдың мамыр айында келісімшарт біржақты түрде бұзылды.
Авансты қайтару үшін Халықаралық сауда палатасының (ICC) Париждегі Арбитраж сотына жүгінуге тура келген. Ұзаққа созылған сот ісінен кейін мердігер тарап келісімге келіп, авансты 2024 жылдың 26 қыркүйегіне дейін қайтаруға және Қазақстанның заңгерлік шығындарын өтеуге (жалпы сомасы 365 мың доллар немесе қазіргі бағам бойынша 175 миллион теңге) міндеттенді. 23 қыркүйекте Әділет министрлігі түрік фирмасының бұл міндеттемелерді орындағанын хабарлады.
