Қазақстан жолдарының сапасын жақсарту жөніндегі Президент тапсырмасына сәйкес енді асфальтбетон шығаратын зауыттардың материалдары қатаң қадағалаудан өтпек. Ол үшін наурыз айында «ҚазжолҒЗИ» АҚ-мен бірлесіп барлық облыстағы асфальтбетон зауыттарына тексеру жүргізіледі.
Одан бөлек республикалық бірыңғай дерекқорды өзектендіру шаралары ұйымдастырылмақ. Мұндай жұмыс республикалық немесе жергілікті маңызы бар жолдардың сапасын арттыруға бағытталған. Оның үстіне Көлік вице-министрі Сатжан Аблалиев жергілікті маңызы бар жолдардың жұмыстары мен материалдарына жасалатын сараптаманы 100% қамтуды тапсырған еді.
Осыған орай биыл Алматы облысының жолдарын жөндеу әрі төсеу кезінде қолданылатын асфальтбетон қоспаларына материалдарды таңдауға көбірек көңіл бөлінетін болды. Енді асфальтбетон зауыттары құрылыс маусымы басталғанға дейін шығарылатын өнімдерін және қолданылатын материалдарын зертханадан өткізулері қажет.
