Сенат төрағасы Мәулен Әшімбаев “ҚазАвтоЖол” мен “Жасыл Даму” компанияларына түсетін миллиардтаған қаражаттың ашықтығы мен бақылау тетіктеріне қатысты мәселе көтерді. Айтуынша, аталған ұйымдардың есеп жүргізу жүйесі түсініксіз. Мұндай олқылықтар қаражаттың тиімсіз жұмсалуына және қоғам сеніміне кері әсер етуі мүмкін екенін жеткізді, деп хабарлайды Tarazy.kz
Әшімбаевтың дерегінше, бұл компанияларға жыл сайын қомақты қаражат түседі. Соған қарамастан, мемлекет бюджеттен қосымша қаржы бөлуін жалғастырып келеді.
“Айтылған мәліметтерге қарасақ, “ҚазАвтоЖол” кейінгі екі жылда 130 миллиард теңге жинаған. Биылғы жыл әлі аяқталмады. Сондай-ақ “Жасыл Даму” акционерлік қоғамы да жұмыс істеп тұр. Осы аяқталмаған жыл ішінде олардың шотына 600 миллиард теңге түскен. Бұл — өте үлкен резерв”, — деді Әшімбаев.
Осы тұста, төраға өңірлердегі жағдайларды еске салды.
“Біз қазір өңірлерге 1 миллиард, кей жерде 500 миллион теңге қажет деп іздеп жүрміз. Ал осы екі компанияға келсек, мемлекет оларға бюджеттен қаржы бөліп келеді. Тіпті 2026 жылға арналған бюджетке де қосымша қаражат енгізілген. Мұнда басқа компанияларды әзірге қозғамай-ақ қояйық”, — деді ол.
Әшімбаевтың айтуынша, негізгі мәселе қаржының бөлінуінде емес, оның бақылауында.
“Осы жерде заңды сұрақ туады: неге біз бұл компанияларға қосымша қаражат бөлеміз? Мәселе тек бөлуде емес, осы қаржының бақылауында. Өйткені бұл қаражат Бірыңғай қазынашылық шотын айналып өтеді. Яғни оған парламенттік және қаржылық бақылау әлсіз. Бюджеттік қаражатты пайдалану кезінде сақталуы тиіс рәсімдер де бұл жағдайда орындалмайды. Демек, бақылау әлсірейді және бұл қаражаттың тиімді игерілуіне қатысты сұрақтар туындайды”, — деп түйіндеді Әшімбаев.
