Әскерде жарақат алған Ербаян Мұхтар ісінде маңызды жаңалық бар. Бұл туралы оның адвокаты Инга Иманбай мәлімдеді, деп хабарлайды Tarazy.kz
«Бас прокуратура қылмыстық істі толық өз өндірісіне алып, барлық материалды жан-жақты қайта зерделейтінін мәлімдеді. Президенттің тікелей тапсырмасынан кейін бұл іске жаңа серпін беріліп отыр. Енді біз Ербаян Мұхтар ісінде әділдік орнайтынына, ал Ербаянды осы күнге жеткізген кінәлі адамдар жауапқа тартылатынына сенеміз», — деді адвокат.
Айта кетейік, Ербаян Мұхтар 2024 жылы желтоқсанда ауруханаға түсті. Ұлттық ұланның әскери бөліміндегілер ата-анасына оның әжетханада құлап, басын соққанын айтқан. Алайда олар бұл нұсқаға сенбей, Ербаян соққыға жығылғанын дәлелдеуге тырысты.
Бұған дейін бас әскери прокурордың бірінші орынбасары Мақсат Қазиев тергеу қалай жүріп жатқанын айтты. Прокуратура өкілі нақты күдіктілер жоқ екенін де жеткізді.
Ал Президент Қасым-Жомарт Тоқаев Бас прокурорға әскерде қаза тапқан сарбаздардың аналарынан түскен арыз-шағымды 12 күн ішінде қарастырып, істі тергеу барысында заңның сақталуына баға беруді тапсырды.
