Мәжіліс депутаты Асхат Аймағамбетов докторантураға (PhD) түсу талаптарына өзгеріс енгізілгенін хабарлады. Оның айтуынша, депутаттық сауалдан кейін жауапты ведомство маңызды шешім қабылдаған, деп хабарлайды Tarazy.kz
Енді төрт білім беру бағыты бойынша PhD бағдарламасына түсушілерден ағылшын тілі сертификаты талап етілмейді. Олар:
– дене шынықтыру;
– музыка;
– қазақ тілі мен әдебиеті;
– орыс тілі мен әдебиеті.
Депутаттың пікірінше, бұл талап бұрын орынды болғанымен, қазіргі заманда, әсіресе жасанды интеллект құралдары кеңінен қолданыла бастаған кезеңде, қайта қарауды қажет еткен.
Сонымен қатар 2026 жылдан бастап докторантураға түсу кезінде дәстүрлі эссенің орнына Research Proposal, яғни ғылыми зерттеу ұсынысын тапсыру тәртібі енгізіледі. Бұл ұсыныс та қабылданған.
Асхат Аймағамбетов аталған шешімдер үшін жауапты министрлікке алғыс білдіріп, Scopus және басқа да өзекті мәселелер бойынша жұмыс жалғасатынын атап өтті.