Қаржылық мониторинг агенттігі «АрселорМитталТеміртау» АҚ-ның құқықтық мирасқоры саналатын Qarmet компаниясының мүлкін жымқыру дерегі бойынша тергеу жүргізіп жатыр. Күдікті ретінде «АлбаСтройДор» ЖШС директоры Сергей Ким танылып, оған кәсіпорын өнімін 1,8 млрд теңгеден астам сомаға заңсыз шығарды деген айып тағылып отыр, деп хабарлайды Tarazy.kz
АФМ-нің БАҚ сұрауларына берген жауабына сәйкес, тергеу металлургиялық зауыт аумағынан домна қоспасы мен кесек шойынды ұрлау фактісі бойынша жүргізілуде.
Қылмыстық схема қалай жүзеге асқан?
2015 жылы «АрселорМитталТеміртау» АҚ мен «АлбаСтройДор» ЖШС арасында домна шлагын қайта өңдеу туралы келісімшарт жасалған. Алайда құжатта қайта өңдеу қалдықтарына иелік ету немесе оларды өткізу құқығы қарастырылмаған.
Соған қарамастан, тергеу дерегінше, Сергей Ким өндірістік нысандарға еркін қолжетімділігін пайдаланып, зауыт аумағынан домна қоспасы мен кесек шойынды жүйелі түрде шығарып отырған.
Ұрланған өнімді кедергісіз тасымалдау үшін қылмыстық схемаға «Кузет 2050» ЖШС атты аффилирленген күзет ұйымы тартылған. Агенттік мәліметінше, күзет қызметкерлері автокөліктердің зауыт аумағынан іс жүзінде бақылаусыз өтуіне жағдай жасаған.
Ал жымқырылған өнім кейіннен Сергей Кимнің бақылауындағы «ГлобалСпецТорг» және «ЦентрОптСнаб» ЖШС арқылы заңдастырылған.
Келтірілген шығын
Тергеу қорытындысына сәйкес, заңсыз әрекеттер салдарынан 31 мың тоннадан астам өнім ұрланып, мемлекетке келтірілген жалпы шығын 1,8 млрд теңгеден асады.
Қазіргі уақытта күдікті Сергей Ким екі ай мерзімге қамауға алынған. Сотқа дейінгі тергеу амалдары жалғасып жатыр.
Еске салайық, Сергей Ким — «Кенжехан» базарының қазіргі басшысы. Кейбір тұлғалар оны Анипа Назарбаева және Мырзахан Масимовпен байланыстырады.
Сондай-ақ белсенді Елена Садвакасова Сергей Кимді айыпталушы журналист Олег Гусевпен байланыстырады. Олег Гусев Украинадағы «Миротворец» сайтының дерекқорына «антиукраиндық және антиқазақтық үгіт-насихат жүргізуші» ретінде енгізілген.