Талғарда 20 жастағы қыз ауруханаға қаралғаннан кейін көз жұмды, деп хабарлайды Tarazy.kz 1tvkz-ке сілтеп.
Талғарда 20 жастағы Нигина Жағыпарова медициналық көмекке жүгінгеннен кейін көп ұзамай қайтыс болды. Қайғылы оқиға 10 қаңтарда болған.
Таңғы уақытта қыз өзін кенет жайсыз сезініп, кеуде тұсы қатты ауырсынуына шағымданған. Ол әжесімен бірге ауруханаға барған. Туыстарының айтуынша, дәрігерлер қажет тексерістер жүргізіп, қан талдауларын алған, кардиограмма мен рентген жасаған. Алдын ала диагноз ретінде пневмония қойылған.
Алайда, туыстарының айтуынша, науқастың жағдайына қарамастан, дәрігерлер оны стационарға жатқызбай, пульмонологтың қабылдауына жолдама беріп, үйіне қайтарған. Нигина үйге келген соң демалып жатқан, бірақ шамамен бір сағат өткен соң көз жұмған.
Марқұмның жақындары дәрігерлердің шешіміне наразылық білдіріп отыр. Олардың пікірінше, қыз ауруханада бақылауда болғанда, бұл қайғылы жағдайдың алдын алуға болар еді.
Марқұм небәрі 20 жаста болған. Жақында ғана оған тұрмысқа шығуға ұсыныс жасалған.
Отбасы әділ әрі жан-жақты тергеу жүргізуді талап етіп, құқық қорғау органдарына арыз түсірген. Қазір мәйітке сот-медициналық сараптама тағайындалып, тәуелсіз сарапшы тартылған.