Павлодар «Қазақстан темір жолы» ұлттық компаниясының филиалында басшылық қызмет атқарған екі лауазымды тұлға 7 жылға сотталды. Сот мәліметінше, олар мердігер ұйымнан жүйелі түрде пара талап еткен, деп хабарлайды Tarazy.kz
Irbis.tv ұсынған ақпаратқа сәйкес, қылмыстық іс Павлодар қаласының қылмыстық істер жөніндегі ауданаралық сотында қаралды. Сот шешіміне сәйкес, айыпталушылардың әрқайсысы 7 жыл мерзімге бас бостандығынан айырылып, өмір бойына мемлекеттік қызмет пен квазимемлекеттік секторда лауазым атқару құқығынан айырылды.
Тергеу материалдарына сәйкес, магистральдық желі бойынша Павлодар бөлімшесінің басшысы мен ҚТЖ-ның дистанция жетекшісі 2025 жылдың ақпан–сәуір айлары аралығында Ақсу-1 стансасында жүргізілген электрмонтаж жұмыстары үшін мердігер компаниядан ақша бопсалаған. Олар орындалған жұмыстар актілеріне кедергісіз қол қоюға және қызметтерді қабылдауға ықпал етуді уәде еткен.
Заңсыз алынған қаражаттың жалпы сомасы 2,7 миллион теңгені құраған. Сот барысында айыпталушылардың кінәсі қылмыстық іс материалдарымен, жасырын тергеу әрекеттерінің нәтижелерімен және куәгерлердің көрсетулерімен толық дәлелденді.
Сонымен қатар сот магистральдық желі бойынша Павлодар бөлімшесінің басшысына қатысты 2021 жылы бағынышты қызметкерінен құны 57 мың теңге болатын кеңсе орындығын алған деректі де назарға алды.
Айыптау үкімі әзірге заңды күшіне енген жоқ және апелляциялық тәртіппен шағымдануға жатады.
