Жасанды интеллект – тек технологиялық жаңалық емес, ол білім мен ғылым саласының дамуына серпін беретін жаңа бағыт. «AI Sana» бағдарламасы білім беру жүйесі мен ғылым саласын цифрлық трансформациялау жолында маңызды рөл атқарып, еліміздің технологиялық дамуына үлес қосатын жас мамандарды дайындауға зор мүмкіндік береді, деп хабарлайды Tarazy.kz
Ілияс Жансүгіров атындағы Жетісу университетінде студенттер арасында «AI SANA CONTEST: WE LEARN, CREATE, CHANGE THE FUTURE» атты республикалық байқау ұйымдастырылды. Байқау білім алушылардың жасанды интеллект құралдарын шығармашылық және техникалық тұрғыда қолдану дағдыларын дамытуға бағытталды.
«Байқаудың негізгі мақсаты – жасанды интеллект мүмкіндіктерін кеңінен насихаттау, қысқа бейнероликтер форматындағы авторлық жобаларды қолдау, сондай-ақ визуалды және дыбыстық контент жасаудағы ЖИ әлеуетін көрсету. Байқауға өтінім қабылдау 2026 жылғы 18 қаңтарда басталды. Білім алушылардан барлығы 62 өтінім келіп түсті. Жалпы, студенттердің шығармашылық және технологиялық әлеуеті жоғары екені додада айқын көрінді», – дейді байқау комиссиясының төрағасы, Цифрландыру және стратегиялық даму жөніндегі проректор Тимур Жұмағұлов.
Студенттер көзімен болашақты айқындайтын байқау «Үздік сахналық сюжет», «Үздік визуалды генерация», «Үздік дыбыстық/музыкалық композиция» атты үш номинация бойынша өтті. Төрелік еткен қазылар алқасының құрамында Талдықорған жоғары политехникалық колледжінің директоры Шыңғыс Нұрғожаев, Цифрландыру және техникалық қамтамасыз ету департаменті директорының міндетін атқарушы Дәулет Батырбеков, Жасанды интеллект және виртуалды шындық зертханасының меңгерушісі Қыдырәлі Ахмет, Процестерді цифрландыру және автоматтандыру бөлімінің басшысы міндетін атқарушы Жайлау Ерасыл, Физика және математика кафедрасының оқытушы-лекторы Жалғас Ахметов, Ақпараттық технологиялар және жасанды интеллект кафедрасының оқытушы-лекторы Әсел Оразбаева, Шығармашылық білім беру кафедрасының оқытушы-ассистенті Арслан Бараков болды.
«Үздік сахналық сюжет» номинациясы бойынша жүлделі І орынды Мүсілім Аймара, ІІ орынды Лаура Байбатырова, ІІІ орынды Тен Виктория иеленді.
«Үздік визуалды генерация» номинациясы бойынша І орынды Амангелді Рахат, ІІ орынды Есімбек Роксана, ІІІ орынды Ерғали Әли жеңіп алды.
«Үздік дыбыстық (музыкалық) композиция» номинациясында І орынға Әсетхан Нұрасыл Әділұлы, ІІ орынға Бақытжанқызы Аружан, ІІІ орынға Ежелев Максим ие болды.
«Қазіргі уақытта әлемді жасанды интеллектсіз елестету қиын. Біз ChatGPT, DALL·E, Midjourney, Runway және ElevenLabs сияқты нейрожелілерді пайдалана отырып, болашақта Жетісу өңірінде туризмді қалай дамытуға болатынын және туған жеріміздің келешек келбетін көрсеттік», – дейді конкурсқа қатысушы Аймара Мүсілім.
Аталған байқау студенттердің шығармашылық әлеуетін арттырып қана қоймай, жасанды интеллект саласындағы білімдері мен тәжірибелерін шыңдауға, сондай-ақ болашақ цифрлық қоғамға бейім маман қалыптастыруға ықпал етеді, – дейді ұйымдастырушылар.