Алматыда көрнекті саясаткер Алтынбек Сәрсенбайұлының рухына арналған еске алу жиыны өтті. Шараны марқұмның отбасы ұйымдастырды. Басқосуға оның замандас әріптестері, достары, қоғам қайраткерлері мен азаматтық белсенділер жиналды, деп хабарлайды Tarazy.kz
2006 жылғы 11 ақпанда Алтынбек Сәрсенбайұлы көмекшісі Бауыржан Байбосын және жүргізушісі Василий Журавлевпен бірге із-түзсіз жоғалған. Екі күннен кейін олардың мәйіті Алматы маңындағы таулы аумақтан табылып, үшеуінің де атып өлтірілгені белгілі болды. Алайда бұл қылмыстың барлық қыры әлі күнге дейін толық ашылған жоқ.
Құқық қорғаушы Евгений Жовтис саяси сипаттағы кісі өлімі істері көбіне әділ тергелмей, саяси ықпалмен жүретінін айтты. Оның пікірінше, бұл іс те түбегейлі, бейтарап тергеліп, қылмысқа қатысы бар барлық тұлғалар анықталуы тиіс.
Марқұмның туыстары мен әріптестері оның өліміне сол кездегі мемлекет басшысы Нұрсұлтан Назарбаев жауапты деп санайтынын жеткізді. Алтынбектің ағасы Рысбек Сәрсенбайұлы істі қайта қарау туралы Президентке, Бас прокурорға және Жоғарғы сотқа ресми арыз жолданғанын хабарлады.
Оның айтуынша, бұл іс міндетті түрде қайта жандануы керек. «Біз қылмысты ұйымдастырғандардан бастап, тікелей атқан адамдарға дейін барлығы әшкереленуін талап етеміз. Біздің мақсатымыз – кек алу емес, әділдікке жету», – деді ол.
Алтынбек Сәрсенбайұлы 1993–2001 жылдары Қоғамдық келісім және ақпарат министрлігін басқарған. Кейін Қауіпсіздік кеңесінің хатшысы, сондай-ақ Ресейдегі Қазақстан елшісі қызметтерін атқарды. 2003 жылдан бастап оппозицияға өтіп, билікті ашық сынады. Әртүрлі кезеңде қастандықтың тапсырыс берушісі ретінде бірнеше адамның аты аталды. Олардың қатарында Сенат аппаратының бұрынғы басшысы Ержан Өтембаев, марқұм Рахат Әлиев және ҰҚК-нің экс-төрағасы Әлнұр Мұсаев бар.