Қазақстанның әлемге танылған әншісі, Димаш Құдайберген Олимпиада чемпионы Михаил Шайдоровқа көлік сыйлайтынын мәлімдеді. Өнер иесінің бұл қадамы әлеуметтік желіде қызу талқыланып, жанкүйерлердің зор қолдауына ие болды, деп хабарлайды Tarazy.kz
Айта кетейік, жуырда өткен Қысқы Олимпиада ойындарында ел намысын абыроймен қорғаған Михаил Шайдоров тарихи жетістікке жетіп, Қазақстан қоржынына алтын медаль салған еді. Оның мұз айдынындағы өнері тек спорт жанкүйерлерін ғана емес, өнер әлемін де тәнті етті.
Әсіресе, еркін бағдарлама кезінде Шайдоровтың Димаштың репертуарындағы әнді таңдауы көпшілікті толқытты. Осы сәтке байланысты әнші спортшыға жүрекжарды лебізін білдірді.
“Досым, қазақтың маңдайына біткен жарық жұлдыз Денис Теннің орнын жоқтатпаймын. Мұз үстіндегі өнерің көпке үміт пен рух сыйлады. Менің орындауымдағы әнді таңдап, мені де марқайтып қойдың. Елге аман-есен жетіп алайық. Бір темір тұлпарың менің мойнымда, бауырым”, – деді әнші.
Бұл сөздер көпшіліктің жүрегіне жетті. Өнер мен спорттың тоғысында туған осындай қолдау ел ішіндегі бірлік пен рухты айқындай түскендей.
Желі қолданушылары Димаштың кең пейіліне ризашылық білдіріп, Шайдоровтың болашағына сенім артты. Көлік сыйлау – жай ғана сыйлық емес, жас спортшыға көрсетілген үлкен құрмет пен қолдау екені анық.
Осылайша, қазақстандық жұлдыздардың бір-біріне демеу болуы – ел мерейін үстем етіп, жас буынға үлгі болары сөзсіз.