Шымкентте жол қауіпсіздігін күшейту мақсатында жүргізіліп жатқан ауқымды жедел-профилактикалық іс-шара аясында бір аптада 500-ден астам көлік айыптұрақтарына қойылған, деп хабарлайды Tarazy.kz
24.kz арнасының мәліметінше, қалаға Жамбыл, Қарағанды және Қызылорда облыстарынан арнайы жасақ келген. Қазіргі уақытта патрульдік қызмет тәулік бойы, яғни күндіз де, түнде де үздіксіз жұмыс істеп жатыр.
Тексеру барысында жол ережесін бұзған немесе құжаттары талапқа сай емес көліктер бірден айып тұрағына жөнелтіледі. Соның нәтижесінде бір апта ішінде 500-ден астам автокөлік арнайы тұраққа қойылған.
Тексеру барысында қалада алғашқы медициналық қобдиша, өрт сөндіргіш және жарық шағылыстыратын кеудешелерге сұраныс күрт артқан. Сондай-ақ техникалық қызмет көрсету орталықтарында да кезек көбейген. Көлік иелері қысқы дөңгелектерін ауыстырып қана қоймай, әйнектегі жарықтарды жөндеуге де жүгіне бастаған.
Алайда полиция өкілдері бір апта ішінде алғашқы көмек қобдишасы немесе өрт сөндіргіштің болмағаны үшін ешкімге айыппұл салынбағанын атап өтті.
Құқық қорғау органдары барлық жұмыс жол қозғалысы ережелеріне сәйкес жүргізіліп жатқанын мәлімдеді. Сонымен қатар тұрғындар арасында түсінбеушілік туындап, түрлі сұрақ көбейгені айтылды.
«Халықтан көп сұрақ түсіп жатыр, біз түсіндіру жұмыстарын жүргізудеміз. Ресми парақшалар мен барлық қолжетімді арналар арқылы ақпарат берілуде. Ешқандай дүрбелеңге берілудің қажеті жоқ», – деп хабарлады Шымкент қалалық полиция департаменті 24.kz арнасына.
