Атырауда отбасы мүшелерін өлтірді деп айыпталған Сұлтан Сәрсемәлиевке қатысты сот басталды, деп хабарлайды Tarazy.kz
Сұлтан Сәрсемәлиев әйелінің ата-анасын, сондай-ақ қайын інілері мен қайын сіңлілерін өлтірді деп айыпталып отыр.
Іс ашық форматта қаралып жатыр. Сот отырысына судья Зарема Хамидуллина төрағалық етіп жатыр.
Еске салайық, бұған дейін Сұлтан Сәрсемәлиевке қатысты сотқа дейінгі тергеу аяқталған еді. Оған Қылмыстық кодекстің 99-бабы 2-бөлігі 1-тармағы бойынша (“екі немесе одан да көп адамды өлтіру”), сондай-ақ мал сату мен банк карталарын жымқыру фактілері бойынша 188 және 190-баптарымен айып тағылған.
Айта кетейік, Атырау облысы Жаңгелдин ауылында тұратын отбасы 2025 жылдың соңында белгісіз жағдайда жоғалып кеткен. 2026 жылғы 6 қаңтарда шаруашылық қорасынан отбасы иесі Мақсот Қарабалин мен оның жұбайы Нәсіп Өтешқалиеваның мәйіттері табылған. Кейін олардың денесінде пышақ жарақаты болғаны анықталды.
Тергеу деректеріне сәйкес, Наурыз Мұқанғалиев 2025 жылдың мамыр айында көз жұмған. Ал отбасының тағы үш мүшесі – отағасы, жұбайы және қызы қараша айында қайтыс болған.
9 қаңтарда марқұмдардың күйеу баласы Сұлтан Сәрсемәлиевке іздеу жарияланғаны белгілі болды. Сол кезде қаза тапқандардың қызы Ақбаян Мұқанғалиеваға да күдікті мәртебесі берілген еді.
Кейінірек, 24 ақпанда Сәрсемәлиев пен Мұқанғалиеваның Индонезиядағы Ломбок аралындағы Сенару ауылында ұсталғаны хабарланды. Наурыз айында олар Атырауға жеткізілді.
Одан соң полиция қызметкерлері Сұлтан Сәрсемәлиевті қылмыс болған үйге апарып, тергеу экспериментін жүргізген. Күдікті сол жерде қылмысты қалай жасағанын көрсетіп, тергеушілердің сұрақтарына жауап берген.
