Алматы алғаш рет халықаралық Boston Consulting Group (BCG) консалтинг компаниясы жасаған Intelligent Cities Index 2026 рейтингіне енді. Қала 61 мегаполистің ішінде 38-орынға жайғасып, 62 ұпай жинады, деп хабарлайды Tarazy.kz
Рейтингте Алматы Ыстанбұл, Милан, Дели, Варшава, Мехико және басқа да ірі қалаларды басып озған. Жалпы тізімде Токио, Гонконг және Джакартамен қатар орналасқан.
Сарапшылар қалаларды тек цифрландыру деңгейі бойынша емес, технологиялар мен жасанды интеллект тұрғындардың өмір сапасын қаншалық жақсартатынына қарай бағалаған. Бағалау кезінде қалалық қызметтердің сапасы, даму стратегиясы, жасанды интеллектіні енгізу, басқару тиімділігі, инфрақұрылым және кадрлық әлеует ескерілген.
Рейтингтің көшін Лондон бастады. Алғашқы бестікке Дубай, Нью-Йорк, Вашингтон және Амстердам да енген.
Зерттеу авторларының пікірінше, шын мәнінде «ақылды қала» — технологиясы көп емес, сол технологиялар тұрғындардың өмірін нақты жақсартатын қала.
