Тараз қаласының әкімі Досаев Қайрат Әскербекұлы аула клубтарына материалдық-техникалық жабдықтармен қамтамасыз ету үшін жергілікті бюджеттен қанша қаражат бөлінгенін айтты, — деп хабарлайды Tarazy.kz.
Қазіргі таңда баланың қызығушылығына септігін тигізіп, икеміне қарай жаңа қырынан танылуына, өмірлік жолын анықтауда аула клубтарының маңызы зор. Аула клубының мақсаты — оқушылардың мектептен тыс өмірін тиімді пайдаланып, өздері оқып жүрген пәндерін тереңдетіп оқыту, жалпы баланы жан-жақты дамытып, бейімін жетілдіру болып табылады. Жастар ресурстық орталыққа қарасты 4 аула клубтары «Арай» (Самал м\а 14 үй, 2-Б пәтер), «Ботақан» (Төле би көшесі 11 үй), «Балауса»(Қарасу м\а 5 үй, 24 пәтер), «Жас балғын» (Талас м/а 10Б) тұрақты жұмыс атқаруда.
«Аталған аула клубтарында 4 жастар ісі жөніндегі инспектор 206 тәрбиеленушілермен түрлі бағыттағы 8 үйірме («Қолөнер», «Шебер қолдар», 2 «Сурет», «Ұлттық ойындар», «Қуыршақ театры», «Тіл дамыту», 2 «Салауатты өмір салты») бойынша жұмыс жасауда», — дейді қала басшысы.
2016 жылы №1 аумақтық округке қарасты «Астана» (12) ықшам ауданы №30 «А» үйде орналасқан «Азимут» аула клубының жертөлесіндегі құбырларының жарылуына байланысты уақытша жұмысын тоқтатқан болатын. 2019 жылы аталған аула клубқа күрделі жөндеу жұмыстарын жүргізу үшін 9 млн. 986 мың теңге қаражат бөлініп, жөндеу жұмыстарын жүргізу жоспарлануда. 2019 жылдың соңына дейін аталған аула клуб пайдалануға берілетін болады.
«Тараз қаласында №9 аумақтық округке қарасты «Бәйтерек» (13) ықшам ауданы, №8 үйде (жалпы алаңы 87,3 шаршы метрді құрайтын), «Құмшағал» тұрғын алқабы, Байтұрсынов көшесі, №1 үйде бос тұрған ғимараттардан балаларға арналған аула клубтарын жыл соңына дейін ашылатын болады. Аталған аула клубтарды материалдық-техникалық жабдықтармен қамтамасыз ету үшін жергілікті бюджеттен 6 миллион теңге қаражат бөлінді», — дейді Қайрат Досаев.
Сонымен қатар, 2019 жылдың 1 маусым күні Халықаралық балаларды қоғау күніне орай «Балауса» аула клубында аталған аула клубқа келуші балалардың ұсынысы бойынша «STREET WORKOUT» алаңшасын, Wi-Fi зонасын, шағын кинозалын, теннис столын, қалқан күрке (беседка), компьютерлер пайдалануға берілді.
