Атақты футболшы Лионель Месси соңғы жетістіктері мен кәсіби мансабынының аяқталуы, өзі өнер көрсететін соңғы футбол клубы жайында айтты, деп хабарлайды Tarazy ақпарат.
Аргентиналық форвард жуырда ESPN арнасына сұқбат берген. Футболшы осы айда 37 жасқа толады. Ол 2023 жылдан бері америкалық «Интер Майами» клубында өнер көрсетіп жүр. Бұл оның Еуропадан жырақта ойнап жүрген алғашқы клубы.
«Дәл қазіргі уақытта бұл менің соңғы клубым шығар деп ойлаймын. Өмір бойы доп теуіп, футбол ойнап келемін. Доп тепкен ұнайды. Жаттығуларды да, жарыстарды да жаным сүйеді. Аздаған үрей бар бойымда, мұның бәрі аяқталады ғой. Футболды жанымдай жақсы көрем, бірақ мұның бәрінің уақыты шектеулі екенін сеземін», деді Месси.
Даңқты ойыншы Аргентина құрамасымен бірге 20 маусым мен 14 шілде аралығында өтетін Америка кубогына дайындалу үстінде. Жарысқа Оңтүстік Американың 10 құрама командасы, Солтүстік Америка мен Кариб бассейнінен 6 команда қатысады.