Алматы облысының Талғар қаласындағы Сәкен Сейфуллин атындағы мектеп 90 жылдық мерейтойын атап өтті, деп хабарлайды Tarazy ақпарат.
Алматы облысының Талғар қаласында орналасқан Сәкен Сейфуллин атындағы №2 жалпы білім беретін орта мектеп өзінің 90 жылдық мерейтойын атап өтті. Мектеп тарихы терең әрі шежірелі: бұл білім ордасы бірнеше буын шәкірттерді тәрбиелеп, еліміздің дамуына үлес қосқан көптеген азаматтарды түлетті.
Талғар аудандық Мәдениет үйінде бастау алған Мерейтойлық іс-шара барысында мектептің тарихи дамуы, белгілі түлектердің жетістіктері және ұстаздардың еңбегі атап өтілді. Іс-шараға ардагер ұстаздар, мектеп түлектері, ата-аналар және құрметті қонақтар қатысты. Жиналған қауым мектеп ұжымына алғыс білдіріп, алдағы уақытта да білім мен тәрбиенің алтын ұясы болуына тілек білдірді.
Сәкен Сейфуллин атындағы мектептің 90 жылдық мерекесі – білім беру саласындағы жетістіктерді көрсетуге, сондай-ақ, жас ұрпаққа үлгі боларлық тарихи тұлғалардың мұрасын дәріптеуге арналған айтулы шара болды. Мектеп ұжымы алдағы уақытта да заманауи білім беру мен тәрбиелеу жұмыстарын жетілдіруді мақсат тұтады. Салтанатты іс-шараның соңы мектеп ұжымы мен оқушылардың өнер көрсетуімен аяқталды.