Алматы қаласында ALT University-де Жол активтері сапасының ұлттық орталығының ұйымдастыруымен “Автомобиль жолдарын салу және жөндеу кезінде жұмыстардың сапасын бақылау және қабылдау” тақырыбында оқыту семинары өтуде, деп хабарлайды Tarazy ақпарат.
Семинарға зертхана меңгерушілері мен кәсіпорын филиалдарының бөлім басшылары қатысып, жол құрылысы мен жөндеу жұмыстарындағы сапаны бақылау бойынша өз білімдерін жетілдіруде. Іс-шара аясында қатысушылар тәжірибе алмасып, жол құрылысындағы заманауи технологиялар мен бақылау әдістерін талқылауда. Мекеменің Алматы қалалық филиалының бөлім басшысы Айдар Бейіспеков мұндай жиынның жұмыс өнімділігіне пайдасы зор дейді.
“Екі күнге жалғасатын семинар барысында жол құрылысында қолданылатын материалдар мен олардың сапасын бағалау әдістері, сондай-ақ халықаралық тәжірибелер негізінде тиімді басқару жүйелері қарастырылуда. Әр өңірден келген әріптестер өз ойларын ортаға салып, қызу талқы болды. Бұл шара алдағы уақытта елдегі жол сапасын жақсартуға және инфрақұрылымның дамуына оң әсерін тигізеді деп күтілуде”, — дейді Айдар Серікұлы.
Ұйымдастырушылардың айтуынша, бұл семинар – елдегі автомобиль жолдарының сапасын арттыруға бағытталған маңызды қадамдардың бірі. Сапалы жол – қауіпсіздік пен ұзақ мерзімді пайдаланудың кепілі. Сондықтан жол саласында еңбек ететін мамандардың біліктілігін арттыру және жаңа әдістерді енгізу — басты мақсат.