Журналист Асхат Ниязов Қытайда қазақ тілінде сөйлей алмай, ұятқа қалды, деп хабарлайды Tarazy.kz
Ол әлеуметтік желідегі парақшасында Қазақстан мен Қытай шекарасында орналасқан Қорғас қалалық ауданында жүрген сәтінен видео жариялаған. Кадрларда журналист жергілікті тұрғындармен тілдесуге тырысады.
Бейнежазбада Асхат Ниязов тұрғындарға орыс тілінде «Жалақыларыңыз қанша?» деген сұрақ қояды. Алайда олардың бірі: «Қазақша сөйлемесеңіз, түсінбейміз», – деп жауап береді.
Осыдан кейін журналистің қасында жүрген танысы оның сұрағын қазақ тіліне аударып береді. Ал Қытайдағы қазақтар: “Біз өзіміз табамыз. Ал егер жұмысшы жалдайтын болсақ, оларға 4000 юань төлейміз”, – деп жауап қатады.
Әңгіме соңында жергілікті тұрғындар журналиске: “Қазақша сөйлеңдер, қазақпыз ғой”, – деп ескерту жасайды.
Аталған жағдайдан соң Асхат Ниязов қатты ыңғайсыз күйге түседі.
“Мені қазақша білмегенім үшін Қытайдағы қандастарымыздың өзі ұялтты. Не ағылшын тілін, не қытай тілін, тіпті қазақ тілін де дұрыс меңгермегенмін. Не деген бейбақпын?” – деп күйінді ол.
Оқиғадан кейін әлеуметтік желі қолданушылары журналистің әрекетін қызу талқылап, түрлі пікір қалдырды. Кейбір желі пайдаланушылары оны сынға алса, енді бірі кемшілігін ашық мойындағанын ескеріп, жақтасып жатты.
“Қытайдағы қазақтарға барып орысша сұрақ қою, ұят қой”, “Ұялғаннан жерге кірді-ау, бала. Бірақ кемістігін еркекше мойындады. Ол да батырлық”, “Айлық деген сөзді де айта алмады ғой, қазақ жігіті” деп жарыса пікір білдірді олар.
