Мұсылмандар үшін қасиетті мерекенің бірі саналатын Құрбан айт биыл 16 маусым күні басталатын болды, деп хабарлайды Tarazy ақпарат. Бұл туралы ҚМДБ мәлімдеді. Бұған дейін биылғы Құрбан айт мерекесі 17 маусымға тура келетіні айтылған.
Діни басқарманың айтуынша, күнтізбедегі атаулы датаны дәл анықтау үшін айдың тууын бақылау керек екен.
“Зул-хижжа айын анықтау үшін зул-қағда айының 29-нда айды бақылайды. Күн батқан кезде жаңа ай көрінсе, келесі күні зул-хижжа айы басталған болып саналады. Егер ауа бұлтты болып, ай көрінбесе, зул-қағда айын 30 күнге толықтырады. Осыған орай, 2024 жылы 6 маусымда жаңа айдың көрінуіне байланысты биыл зұлхижжа айы 7 маусымда басталып, арапа 15 маусымға, ал құрбан айт 16 маусымға сай келеді” — деп көрсетілген ресми мәліметте.
Құрбан айт мерекесі үш күнге созылады. Ал қазақстандықтар діни мереке болғандықтан тек алғашқы күні демалады. Ал алғашқы күн 16 маусымға, яғни жексенбіге тура келеді.