Мемлекет басшысының АҚШ-қа жасаған жұмыс сапары барысында Америкада тұратын және білім алып жатқан отандастармен кездесу өтті. Президентпен жүздесу бақытына ие болған отандастар арасында Алматы қаласының білім беру жүйесінің өкілдері де болды, деп хабарлайды Tarazy.kz
Қазіргі уақытта «Болашақ» халықаралық стипендиялық бағдарламасы аясында біліктілігін арттырып жүрген Алматы қаласы Білім басқармасы басшысының орынбасары Айдын Сайлаубай және Наурызбай аудандық білім бөлімінің басшысы Салтанат Құсайынова Вашингтондағы кездесуге қатысты.
Кездесу жылы әрі сенімді атмосферада өтті. Президент жас буынға үлкен үміт артатынын атап өтіп, мемлекет жастарды дамыту және олардың өзін-өзі жүзеге асыруы үшін барлық қажетті жағдайларды жасауға басымдық беретінін жеткізді.
Әңгімелесу барысында алдағы республикалық референдумға ерекше назар аударылды. Президент жаңа Конституция жобасы бойынша өтетін референдумды еліміздің болашағы үшін тарихи маңызы бар оқиға деп атады.
Өз кезегінде, «Болашақ» бағдарламасының стипендиаттары, студенттер мен жас ғалымдар ғылым мен білім саласына көрсетіліп жатқан жан-жақты қолдау және отандық білім беру жүйесін одан әрі дамыту үшін шетелдің озық тәжірибесін игеруге жасалған мүмкіндік үшін Қасым-Жомарт Тоқаевқа алғыстарын білдірді.
