Әуе компаниясын сотқа берген Шымкенттік отбасы жеңіске жетті. Олар 12 сағаттан аса кешіккен рейстен кейін шығынын өндіріп алды, деп хабарлайды Tarazy.kz
Шымкенттен Астанаға ұшатын ұшақ ұзақ уақытқа кешігіп, жолаушылар келесі рейске үлгермей қалған. Соның салдарынан олар діттеген жеріне көлікпен баруға мәжбүр болған. Жол шығыны 500 мың теңгеден асқан. Сонымен қатар, талапкер моральдық зиян үшін 250 мың теңге сұраған.
Бұл туралы журналист Михаил Козачков хабарлады.
Сот барысында әуе компаниясының өкілі кінәні мойындағанымен, шығынның бір бөлігін ғана өтеуді ұсынған. Алайда сот талапты ішінара қанағаттандырып, тасымалдаушыны өтемақы төлеуге міндеттеген.
Сот шешімі бойынша:
- 370 мың теңге — материалдық шығын;
- 100 мың теңге — моральдық зиян;
- 200 мың теңге — заңгер қызметі үшін төлем.
Осылайша жалпы өтемақы көлемі 670 мың теңге болды.
