Қазақстандық кәсіпкер Дулат Тастекей «Артық білім – кітапта» атты ерекше челленджді бастады. 23 сәуір – Халықаралық кітап күні қарсаңында, «ASSYLTAS» қоғамдық қорының негізін қалаушы өз туған өңірі – Абай облысына 14 мыңнан астам кітап сыйға тартты.
Өңірдегі 233 мектептің әрқайсысы 60-тан аса таңдаулы көркем және танымдық туынды алады. Дулат Тастекей өзге өңірлердегі меценаттарды бұл ағартушылық челленджді жалғастыруға шақырды.
– «Артық білім – кітапта» акциясы – бұл ағартушылық эстафета. Біз еліміздің басқа өңірлеріндегі меценаттар мен кәсіпкерлерге, жүрегі ел деп соққан барлық азаматтарға үндеу тастаймыз: келіңіздер, өз облыстарыңыздағы мектептерге де осындай кітап тарту дәстүрін бастайық. Себебі кітап оқитын бала – ертең елдің тірегі, ал кітапты құрметтеген халық – мәңгі жасайтын ұлт, – деді Дулат Тастекей.
Құнды кітаптарға толы үлкен фура Алматы қаласынан шығып, Абай облысының Аягөз қаласына жетті. Бұл кітаптар мектеп кітапханашыларына 23 сәуір күні сағат 14:00-де салтанатты түрде табысталды.
Жобаның басты мақсаты – қазақстандық оқушыларды кітап оқуға шабыттандыру, кітапты күштің, ойдың және тілдің қайнар көзі ретінде қайта жаңғырту.
«Артық білім – кітапта» жобасы ASSYLTAS қорының миссиясына толық сәйкес келеді. Қордың басты мақсаты – еліміздің ауылдық аймақтарындағы әрбір балаға білім алуда, рухани және зияткерлік тұрғыдан тең мүмкіндік жасау.
Жоба ұлы ойшыл Абай Құнанбайұлының 180 жылдығына арналған және Халықаралық «Қазақ тілі» қоғамы мен Абай облысы әкімдігінің қолдауымен жүзеге асуда.
