Кеген ауданында орналасқан Қара шатқалда шыныдан аспалы көпір салынбақшы. Тіпті көпірді шытынатып көрсететін арнайы экран дыбыс эффектісімен қойылады, деп хабарлайды alataunews.kz сайтына сілтеме жасаған Tarazy ақпарат.
Жаңа жоба 2024 жылдың 1 қарашасында Алматы облысы, Кеген ауданында өткен ауқымды баспасөз турында таныстырылды. Аспалы көпір Қытайдағы көпір секілді шыныдан салынады деп жоспарланып отыр. Жалпы көпірдің биіктігі 80 метр болса ұзындығы 170 метрді құрайды. Бір уақытта 500 адамды көтере алады дейді «ASK Сapital» компаниясының өкілі.
«Жоба ТМД бойынша ерекше болғалы тұр. Біздің салатын көпір Қытай еліндегідей шыныдан жасалатын болады. Жобамызда көпірді шытынатып көрсететін арнайы экран дыбыс эффектісімен қойылады деп жоспарлап отырмыз. Тіпті, туристтер көпірден жәй ғана өтіп қоймай көпірдің арғы бетіне көңіл көтеретін алаң жасалады және атпен серуендеу, квадрацикл сияқты ойын алаңдары болады. Жоба 2025 жылдың күз айында аяқталады”, — деді “ASK Capital” өкілі Манат Тагаев.
Туристік аймақты дамыту үшін және Қара шатқалға электр желісін тарту жұмыстары жақында қолға алынады. Кеген ауданының әкімдігі «электр желісін тарту — аймақтағы туризмді дамыту» деп санайды. Қазіргі уақытта, «Қара шатқал» ЖШС-не 400,0 млн теңге инвестиция тартылды. Ал «ASK Capital» компаниясы туристік жобаны жүзеге асыруға 1,5 млрд теңге қаржы құюды жоспарлап отыр.
“Қазіргі уақытта, Қара шатқал жобасын іске асырудамыз 3 жыл ішінде 500 млн теңге инвестиция құюға дайынбыз. Мұнда 3 жыл ішінде 30 үй тұрғызылып, 3 түрлі котедж және 3 ресторан салынатын болады. Өздеріңіз білетін қазіргі уақытта экотуризм өте жақсы дамуда. Сондықтан шатырлы қалашық және хайтек стиліндегі үйлер салынатын болады”, — деп атап өтті кәсіпкер Көлбаев Сырым.
Сонымен қатар, инвестор мұнда келетін туристер үшін 2-3 күндік турлар жасауға да дайын екендігін айтты. Тіпті, келушілерге арнайы баспалдақ арқылы суға жақындауға да мүмкіндік жасалады. Қара шатқалдағы алғашқы туристік нысандар келер жылы қолданысқа беріле бастайды дейді компания өкілдері.