9 желтоқсанда Үкімет үйінде Үкімет отырысы өтіп, көлік-транзит саласын дамыту мен цифрландыру мәселесі қарастырылды, деп хабарлайды Tarazy.kz
Көлік министрі Нұрлан Сауранбаев, «ҚТЖ» ҰК» АҚ басқарма төрағасы Талғат Алдыбергенов, «ҚазАвтоЖол «ҰК» АҚ басқарма төрағасы Дархан Иманашев отырыс қорытындысы бойынша баспасөз конференциясын өткізді.
Брифинг барысында «Қазақстан темір жолы» ұлттық компаниясының (ҚТЖ) басқарма төрағасы Талғат Алдыбергеновке «ҚТЖ-ның қарызы азайды ма, IPO-ға қашан шығады?» деген сұрақ қойылды.
«КТЖ-ның долгы бар, бірақ… Менің орынбасарым», — деп шала жауап берген Талғат Алдыбергенов сұрақты орынбасарына сілтеген.
Есесіне премьер-министр Олжас Бектенов Үкімет отырысында жасанды интеллект және цифрлық даму вице-министрі Ростислав Коняшкинді мақтады. Вице-министр көлік-транзит саласына цифрлық құралдарды енгізуге арналған баяндамасын толық қазақ тілінде жасап, Олжас Бектеновтің оң бағасын алған.
«Жақсы, қазақ тілінде баяндадыңыз. Дұрыс, үйрену керек», – деді премьер-министр.
