Алматыдағы әл-Фараби даңғылында болған жантүршігерлік жол апатынан кейін депутат Мұрат Әбенов қаладағы тәртіп пен жауапкершілік мәселесін ашық көтерді. Ол мегаполистің бас полицейін орнынан алуды талап етті, деп хабарлайды Tarazy.kz
Оның айтуынша, бұл қайғылы жағдай кездейсоқ емес және алдын алуға болатын еді.
«Бұл төрт бірдей кінәсіз адамның өмірін қиған апат. Бұл көлікті ойыншыққа айналдырған адамдардың салдары. Олар үшін жолдағы басқа адамдар жай ғана ойын. Мен бүгін іссапармен Алматыға келіп, өз көзіммен бұл заңсыздықтың әлі де жалғасып жатқанын көрдім. Небәрі 30–40 минут ішінде әл-Фараби даңғылымен жүріп өттім. Осы жерден шамамен 500 метр немесе 1 шақырым жерде болған апатты біле тұра, дәл сол көшеде көліктердің әлі де жоғары жылдамдықпен жүйткіп жүргенін көрдім», деді депутат.
Ол қалада заңсыз жарыстар ашық түрде өтіп жатқанын атап өтті.
«Алматы тұрғындарының көбі біледі кешке қарай әл-Фараби даңғылы заңсыз жарыс өтетін орынға айналады. Бұл қоғам үшін өте қауіпті. Полиция мұны біледі. Камералар бар. Қандай көліктер, кімдер қатысатыны да белгілі. Бірақ ешкім тоқтатпайды. Көліктер тәркіленбейді, жүргізушілер жазаланбайды. Себебі олар ықпалды адамдардың балалары немесе бай адамдар. Сонда заң тек қарапайым халыққа ғана ма», деді Әбенов.
Депутат құқық қолданудағы қос стандартты сынға алды.
«Қарапайым адам аз ғана алкоголь ішсе бірден 15 тәулікке қамалып, жүргізуші куәлігінен айырылады. Ал саналы түрде 200 км сағ жылдамдықпен қала ішінде жарыс ұйымдастырып, адам өміріне қауіп төндіргендерге еш шара қолданылмайды. Бұл әділетсіздік. Құрметті министр Ержан Саденов, сіздің Алматыдағы өкіліңіз өз міндетін атқара алмай отыр. Қалада тәртіп жоқ. Әл-Фараби даңғылы түнде заңсыз жарыс алаңына айналады. Бұл болашақтағы жаңа қайғылы оқиғалардың бастамасы. Заң болуы керек. Және ол бәріне бірдей қолданылуы тиіс», деді ол.
