Алматыда мотоцикл кроссы бойынша Қазақстан Республикасы чемпионатының бірінші кезеңі өтті. Маусымның дәл осы қалада басталуы заңдылық — оңтүстік өңірде топырақты трассалар маусымы ерте ашылады, сондықтан республикалық жарыс күнтізбесінің табиғи бастауы да осы жерден қалыптасады, деп хабарлайды Tarazy.kz
Жарыс Алматы қаласы Түрксіб ауданында (Қайрат шағынауданы 282) орналасқан Құлжа тасжолы бойындағы арнайы трассада өтті. Аталған алаң толыққанды жаттығу және жарыс өткізуге бейімделген: жарықтандыру жүйесі кешкі уақытта жаттығуға мүмкіндік береді, ал суару жүйесі трасса сапасын сақтап, қауіпсіздікті қамтамасыз етеді. Бұл — еліміздегі мотокросс инфрақұрылымының дамып келе жатқанын көрсететін маңызды фактор.
Трасса аралас топырақпен жабдықталған және тұрақты күтім жасалады. Барлық элементтері қауіпсіздік талаптарына сай кәсіби деңгейде әзірленген, бұл спортшылардың сапалы дайындалуына мүмкіндік береді.
Жарысқа Қазақстан, Қырғызстан және Өзбекстаннан келген спортшылар қатысты. Чемпионат аясында түрлі жас санаттары мен кластар бойынша бәсекелер ұйымдастырылды: 50 см³-тан бастап Open санатына дейін, сондай-ақ қыздарға арналған жеке категория қарастырылды.
Мотокросс — тек жылдамдық пен адреналин ғана емес, жоғары дайындықты талап ететін күрделі спорт түрі. Спортшылар физикалық төзімділікпен қатар техникамен жұмыс істеу, жылдам шешім қабылдау және тұрақты жаттығу тәртібін сақтауы тиіс. Осыған байланысты әлемдік тәжірибеде спортшының айналасында толыққанды команда қалыптасады.
Қазақстанда бұл бағыт әлі даму үстінде. Негізгі мәселе — қызығушылықтың емес, жүйелі қолдаудың шектеулі болуы. Соған қарамастан, соңғы жылдары мотокроссқа қызығушылық артып келеді, ал Алматыдағы трассаға басқа өңірлерден және шетелден келетін спортшылар саны көбейіп отыр.
Алматыдағы бұл кезең тек жарыс емес, елімізде мотокросс мәдениеті мен инфрақұрылымының қалыптасып келе жатқанының айқын көрінісі. Қала спортшыларға заманауи әрі қауіпсіз жағдайда жаттығуға мүмкіндік беріп, ал спорттың өзіне кең аудиторияға шығуға жол ашып отыр.
