Қазақстандық саясаткер Төлеутай Рақымбеков «Ауыл» партиясынан шыққанын мәлімдеді. Бұл туралы ол әлеуметтік желідегі парақшасында жазды, деп хабарлайды Tarazy.kz
Рақымбековтің айтуынша, оның қоғамдық-саяси қызметі 2015 жылдың қыркүйегінен бері аталған партиямен тікелей байланысты болған.
«11 жылға жуық уақыт бойы менің қоғамдық-саяси өмірім «Ауыл» партиясымен байланысты болды. Осы уақыт ішінде партия мені 2019 жылғы президент сайлауына, 2021 және 2023 жылдардағы Мәжіліс сайлауына кандидат ретінде ұсынды», – деп жазды ол.
Сондай-ақ саясаткер партияның президиумы мен саяси кеңесінің мүшесі болғанын, бес жылдан астам уақыт партия төрағасының бірінші орынбасары қызметін атқарғанын айтты.
«Ұзақ ойланғаннан кейін партияның барлық сайланбалы органдарынан және мүшелігінен шығу туралы шешім қабылдадым. Осыған байланысты 4 мамыр күні өтінішімді жолдадым», – деді Төлеутай Рақымбеков.
Ол партияға және бірге қызмет атқарған әріптестеріне алғыс білдірді.
«Партияға және азаматтардың сенімін ақтауға адал еңбек еткен барлық әріптестеріме ризашылығымды білдіремін», – деп жазды саясаткер.
