Астанада Қазақстан Республикасы Парламенті Сенатының соңғы отырысы өтті. Жиында депутаттар бірқатар заңды мақұлдап, жоғарғы палатаның 30 жылдық жұмысына қорытынды жасады, деп хабарлайды Tarazy.kz
Сенат төрағасы Мәулен Әшімбаевтың айтуынша, ертең Парламент палаталарының бірлескен отырысында кезекті сессия ресми түрде жабылады. Ал 1 шілдеден бастап жаңа Конституция күшіне еніп, қазіргі Парламенттің өкілеттігі тоқтайды.
Осылайша, 1995 жылғы Конституция негізінде құрылған екі палаталы Парламент өзінің тарихи миссиясын аяқтап отыр. Сенат елдің заң шығару жүйесінде 30 жыл бойы маңызды рөл атқарып, мемлекеттік басқару мен құқықтық реформалардың жүзеге асуына үлес қосты.
«Құрметті әріптестер, бізді дамудың жаңа кезеңі күтіп тұр. Алда ауқымды әрі күрделі міндеттер бар. Парламент Сенатының 30 жылдық тәжірибесін қамтитын және жұмысын жаңа форматта бастайтын Құрылтайға алдағы қызметінде табыс тілейміз», – деді Мәулен Әшімбаев.
Сенат төрағасы сөз соңында елдің дамуы мен тәуелсіздіктің мәңгі болуын тілеп, барша азаматты Қазақстанның игілігі үшін бірлесе еңбек етуге шақырды.
«Еліміз гүлденсін, тәуелсіздігіміз мәңгі болсын. Еліміздің игілігі үшін бәріміз бірге жұмыс істейік», – деді ол.
