Ресей президенті Владимир Путин елдегі жанармай тапшылығы мен жеткізілімдегі іркілістер әлі де сақталып отырғанын мәлімдеді, деп хабарлайды Tarazy.kz Bloomberg-ке сілтеме жасап.
Путиннің айтуынша, нарықты тұрақтандыруға бағытталған шаралар қабылданып жатқанына қарамастан, мәселе толық шешілмеген.
«Автокөлік жүргізушілері мен бизнес үшін қиындықтар әлі де бар екенін жақсы білесіздер. Өкінішке қарай, жанармай құю бекеттерінде кезек те сақталып отыр. Кейде қажетті сападағы бензинді табу мүмкін болмай жатады», – деді Ресей президенті.
Оның сөзінше, билік жағдайды тұрақтандыру үшін түрлі тетіктерді қарастырып жатыр. Соның ішінде дизель отынын экспорттауға толық тыйым салу мүмкіндігі де талқылануда. Алайда бұл жөнінде түпкілікті шешім әлі қабылданбаған.
Путин сондай-ақ елдегі бензин қоры былтырғы деңгейге жуық екенін айтты. Оның мәліметінше, қазіргі таңда қор көлемі шамамен 1,7 млн тоннаны құрайды.
Президенттің сөзінше, шілде айында жанармай өндірісі маусыммен салыстырғанда артады деп күтілуде. Сонымен қатар Ресейдегі мұнай өңдеу зауыттары қазір барынша жоғары қуатта жұмыс істеп жатыр.
