Шымкентте орнатылған смарт-дәретханалар кей азаматтардың жауапсыз әрекеттерінен бүлініп жатыр. Қаланың санитарлық жағдайын жақсартып, тұрғындар үшін қолайлы орта қалыптастыру мақсатында қойылған нысандарды әдейі сындыру, ішіндегі жабдықтарды жарамсыз ету жағдайлары жиілеп кеткен, деп хабарлайды Tarazy.kz Sn.kz-ке сілтеме жасап.
Жауапты мамандардың мәліметінше, қоғамдық әжетханаларда гүлдерді жұлып кету, кәріз жүйесін бітеп тастау, техникалық құрылғыларды қасақана зақымдау сияқты әрекеттер жиі кездеседі. Мұның барлығы жобаны жүзеге асырып отырған тарапқа айтарлықтай материалдық шығын келтіріп жатыр.
Соңғы оқиға кезінде екі белгісіз адам әжетхана ішіндегі техниканы әдейі істен шығарған. Олар фенді сымымен қоса жұлып алып, нысанның қалыпты жұмысын тоқтатуға себеп болған. Жоба менеджері Милана Перемитинаның айтуынша, бұл жай ғана абайсыздық емес, қасақана жасалған әрекет.
Аталған жағдай бойынша жоба қызметкерлері полицияға арыз түсірген. Қазір құқық қорғау органдары оқиғаның мән-жайын анықтап жатыр.
Айта кетейік, мұндай жағдайлар Шымкентте бұрын да тіркелген. Өткен жылы Арбат аумағында белгісіз біреу қоғамдық орындардың есіктерін әдейі бітеп тастаған болатын. Кейін күдікті ұсталған. Ал биылғы жыл қоғамдық мүлікті бүлдіру деректерімен басталып отыр.
Мамандардың айтуынша, бір смарт-дәретхананы орнатуға шамамен 50 миллион теңге жұмсалған. Сондықтан кез келген бүлінген жабдық қала бюджеті мен жобаны іске асырушылар үшін үлкен шығын саналады.
Осыған байланысты жоба авторлары мен қала билігі тұрғындар мен қала қонақтарын ортақ мүлікке ұқыпты қарауға шақырып отыр. Өйткені қоғамдық нысандардың сақталуы ең алдымен қоғамның жауапкершілігіне байланысты.
