Таразда қалалық бағыттар бойынша автобустарды жаңалау мәселесі жүйелі түрде жүзеге асырылып келеді, — деп хабарлайды Tarazy.kz тілшісі.
Өткен жылы қала автопарктері 71 бірлік немесе 15 пайызға жаңа автобустармен қамтылған болса, ағымдағы жылдың соңына дейін 100 автобуспен немесе 21 пайызға жаңарту жоспарланып отыр. Бұл туралы облыстық Жолаушылар көлігі және автомобиль жолдары басқармасының басшысы Бақытжан Жәнібеков айтып берді. Сондай-ақ ол қаладағы барлық 670 автобустың 213-інің тозығы жеткенін, пайдалану мерзімдері 7 жылдан асқандығын жеткізді.
Басқарма басшысы қоғамдық көлікпен қамтылмаған елді мекендерге автобус қатынасы ұйымдастырылып жатқанын да тілге тиек етті.
«Ауданаралық автобус маршруттарына оңтайландыру жұмыстары жүргізілді. Мәселен, бірін-бірі қайталайтын бағыттар саны қысқартылып, оның орнына қоғамдық көлікпен қамтылмаған елді мекендерге автобус қатынасы ұйымдастырылды. Нәтижесінде 84 ауданаралық бағыттан 72 нақты қажетті бағыттар қалды», — деді Бақытжан Жәнібеков.
Шаһардағы 80 пайызы автобустардың пайдалану мерзімі 7 жылға дейін рұқсат етілген болса, олардың басым көпшілігі уақытына жетпей жатып сыр бере бастаған. Ал соңғы бір айда 42 жолаушылар көлігі жұмыстан шеттетілді. Тасымалдаушы мекемелер келісімшарт бойынша 2 жыл сайын көліктердің 20 пайызын жаңалауға міндетті. Алайда олардың бірқатары бұл талаптарды орындамай отыр. Нәтижесінде жергілікті тұрғындар тозығы жеткен қоғамдық көліктермен қатынауға мәжбүр.
Айта кету керек, өңірде автобустардың қатысуымен болатын жол-көлік оқиғалары да жиілеген. Облыстық полиция департаментінің мәліметіне сәйкес соңғы 7 айда осындай 27 дерек тіркелген. Салдарынан 17 адам опат болып, 97-сі жарақат алды.
«Көбі 2013-2014 жылғы. Олардың барлығы мына Қытай зауытынан шығарылған автокөліктер. Пайдалану мерзімдері әлі 5-6 жыл болғанның өзінде де бүгінгі таңда тозығы жеткендігін білдіріп жүр. Осы мәселе бойынша тасмалдаушы мекемелерге міндеттер қойылған. Бүгінгі таңда бұл жоспар тасмалдаушымен толық орындалып отыр. Ал тасмалдаушылар бұл талаптарды орындап жатқан жоқ», — дейді қалалық көлік және жолаушы тасымалы секторының меңгерушісі Ғабит Алтаев.
