Блогер Думан Ерқанат ісін ҚР Жоғарғы Соты қарап, Алматы қалалық сотының ақтау үкімінің күшін жойып, кәсіпкерді қайтадан бес жылға соттады, деп хабарлайды Tarazy ақпарат.
“ҚР Жоғары сотының қылмыстық істер жөніндегі сот алқасы қаулы енгізеді. Думан Ерқанатқа қатысты Алматы қалалық сотының қылмыстық істер жөніндегі сот алқасының 2024 жылғы 23 қаңтардағы ақтау үкімінің күші жойылсын. Думан Ерқанатқа қатысты Алматы қаласы Бостандық ауданының нөмірі 2-ші аудандық сотының 2023 жылдың 13 қыркүйегіндегі айыптау үкімі өзгеріссіз қалдырылсын. Думан Ерқанат дереу сот залынан күзетпен ұстауға алынсын. Жазаны өтеу мерзімі күзетпен ұсталған күннен бастап, 2024 жылдың 18 маусымынан бастап есептелсін«, – деді Қылмыстық істер жөніндегі сот алқасының төрайымы Назгүл Рахметтуллина.
Естеріңізге сала кетейік, Думан Ерқанат қыз зорлады деген айыппен 2023 жылы 13 қыркүйекте 5 жылға сотталған. Үкіммен келіспеген блогер апелляциялық шағым түсіріп, оны Алматы қалалық соты ақтаған еді. Алайда жәбірлендім деген бойжеткен Жоғарғы Сотқа шағым түсірді. Ал блогер кеше ғана өзінің кінәсіз екенін айтып, “жәбірленуші” одан 100 миллион теңге талап еткенін мәлімдеген.