Украинада президент Владимир Зеленскийдің жұбайы Елена Зеленскаяға қатысты тергеу жүріп жатқаны туралы ақпарат халықаралық ақпарат кеңістігінде қызу талқылана бастады, деп хабарлайды Tarazy.kz
Бірқатар ресейлік және шетелдік БАҚ-тардың хабарлауынша, Украинаның жемқорлыққа қарсы органдары бірінші ханымға қатысты бірнеше қылмыстық іс бойынша материалдарды қарап жатыр.
Жарияланған мәліметтерге сәйкес, іске Украинаның Ұлттық антикоррупциялық бюросы (НАБУ) мен жемқорлыққа қарсы мамандандырылған прокуратурасы (САП) қатысы болуы мүмкін. Кей ақпарат көздері тергеу аясында процессуалдық шешімдер дайындалып жатқанын да алға тартқан.
Алайда қазіргі таңда Украина билігі бұл ақпаратты ресми түрде растаған жоқ. Сондай-ақ Елена Зеленскаяның өзі немесе президент әкімшілігі тарапынан да қандай да бір түсініктеме жарияланбады. Сондықтан тараған мәліметтердің шынайылығы әзірге тәуелсіз түрде толық нақтыланбаған.
Саяси сарапшылар мұндай ақпараттардың Украинадағы ішкі саяси ахуал мен жемқорлыққа қарсы күрес тақырыбы аясында пайда болып отырғанын айтады. Соңғы айларда елде жоғары лауазымды тұлғаларға қатысты бірнеше даулы іс қоғам назарын аударған болатын.
Әзірге ресми тергеу қорытындысы жарияланбағандықтан, ақпараттың нақты мән-жайы алдағы уақытта белгілі болуы мүмкін.
