Қазақстанда алдағы уақытта жаңа саяси партиялар пайда болуы мүмкін, деп хабарлайды Tarazy.kz
Бұл туралы Сенат төрағасы Маулен Әшімбаев кулуарда мәлімдеді.
Оның айтуынша, азаматтардың саяси партиялар құруға құқығы бар және бұл үдеріс заң талаптарына сай жүзеге асуы тиіс.
«Азаматтар қоғамдық ұйымдар мен саяси партиялар құра алады. Ең бастысы — заң талаптарына сәйкес болу, қажетті рәсімдерді орындау, қол жинау және басқа да талаптарды сақтау», – деді Әшімбаев.
Сенат спикері қазіргі сайлау жүйесіндегі өзгерістер бұл үдерісті жеделдететінін атап өтті.
«Біз парламентті толықтай партиялық тізімдер арқылы сайлау жүйесіне өттік. Бұл шешімдер партиялық жүйенің дамуына және жаңа партиялардың пайда болуына қуатты серпін береді», – деді ол.
Әшімбаевтың пікірінше, елдің дамуы үшін саяси партиялар арасында бәсекелестік болуы аса маңызды.
«Жаңа партиялардың пайда болуы, қолданыстағы партиялардың тек сайлау кезінде ғана емес, тұрақты түрде белсенді болуы, Қазақстанның дамуы үшін маңызды. Қоғамдағы түрлі топтардың пікірлері заң шығарушы органда көрініс табуы керек», – деді ол.
Сондай-ақ спикер партиялар арасындағы бәсекелестіктің ел дамуына оң әсер ететінін атап өтті.
«Жаңа партиялар пайда болсын, бәсекелестік болсын. Әр партия өз бағдарламасының сұранысқа ие екенін дәлелдеуі керек. Партиялық бәсекелестік тек пайда әкеледі деп ойлаймын», – деді Әшімбаев.
