Алматы облысында 19 елдімекенде тұратын 120 мың халық жағымсыз иіспен күн кешіп жатыр. Себебі Алматыдан шығатын бүкіл кәріз қалдықтары Іле ауданына келіп тазарту орталығына құяды. Ол тазарту жүйесі 1974 жылы пайда болған. Ал қаладан келетін шайынды суды тазартатын “Тоспа су” мекемесі 1955 жылы құрылған. Осы маңдағы Н.Тілендиев, Қараой, Ащыбұлақ, Жәпек батыр, Қосөзен, М.Түймебаев сияқты бірнеше елдімекен жыл өткен сайын ұлғайып, тазарту орталығына барынша жақындаған.
Жағымсыз иістен әбден зардап шеккен халықпен Respublica партиясының өкілдері кездесті. Мән-жайды толығырақ білу мақсатында партияның орталық аппарат басшысы Бақытбек Хамит, партияның Алматы және Жетісу облыстық филиалдарының төрағалары, Алматы қаласы мен облысының мәслихат депутаттары мәселе туындаған аймаққа барды.
![Фото: tarazy.kz](http://tarazy.kz/wp-content/uploads/2024/06/img_1144-scaled.jpeg)
Күнделікті метан газын жұтып, жағымсыз иіспен тыныстап жүргенде сырқаттану қаупі бар дейді халық. Қолқаны қабар мүңкіген иіс әбден мезі етті дейді олар. “Алматы Су” мекемесінің өкілдері жаңа тазарту жүйесін орнату үшін сараптама қорытындысын күтіп отырмыз, ол құжатқа экологияға жауапты өкілдер мен Санитарлық эпидемиология мамандары қол қоймай отыр дейді. Себебі тазарту құрылғылары тұрғын үйлерге, елдімекендерге тым жақын.
![Фото: tarazy.kz](http://tarazy.kz/wp-content/uploads/2024/06/img_1117-scaled.jpeg)
Бұл тазарту орталығына тек Алматы емес, Талғар мен Қарасай аудандарынан кәріз сулары келіп құйылады. Жақын арада бұл орталыққа жаңадан бой көтеретерін Алатау қаласы мен Гейт сити де қосылуы мүмкін. Ал тұрғындар орын алған проблема жақын арада шешілмесе, экологиялық апат туындауы мүмкін дейді. Жиынға қатысқан мәслихат депутаттары, Respublica партиясының өкілдері мәселені Парламентте көтеріп, Үкіметтік деңгейде шешуге талпынатындарын айтты.