Алматының Түрксіб ауданындағы Закарпатская көшесінде орташа жөндеу жұмыстары жүріп жатыр. Аталған көшенің жол жабыны ауыстырылып, жаңа асфальт қабаты төселуде, деп хабарлайды Tarazy ақпарат.
Жол активтерінің ұлттық сапа орталығы Алматы филиалының мамандары жолдың орташа жөндеу жұмыстарына белсене қатысып, жол салу барысын қадағалауда. Мекеме инженері Досжан Сұрапбергеновтің айтуынша, орташа жөндеу жұмыстарына полимер титан қоспасы пайдаланылуда.
“Біздің мекеме Алматы қаласының Мобильді басқармасымен бекітілген келісімшарт аясында жол салуда құрылыстың сапасына сараптама жасап жатыр. Жол қабатынан сынамалар алынуда. Орташа жол жөндеу барысында тиісті технологиялардың сақталуы, құрылыс материалдарының сапасы тексерілуде. Тағы бір айта кетер мәселе, жол салуда полимерлі қоспа қолданатын нысандарға біздің орталық ерекше назар аударады. Себебі жаңа технология жаңа талапты, өзгеше назар аударуды қажет етеді”, дейді мекеме инженері.
Аталған орташа жол жөндеу жұмыстарын “BCS Construction” ЖШС орындап жатыр. Сонымен қатар, Түрксіб ауданында жолдарды шұңқырлы жөндеу жалғасып жатыр, қазір 13 500 м2 жол төсемі жөндеуден өтті. Жөндеу жұмыстары Кожедуб көшесінде Шемякин көшесінен Сүйінбай көшесіне дейін жүргізіледі, сондай-ақ Руставели көшесінде жалғасуда. Жөндеу жұмыстары Шемякин/Кожедуб, Даналық, Айша бибі, Майлин, Бұқтырма, Хмельницкий көшесінің оңтүстік бөлігінде аяқталды.