Жол активтері сапасының ұлттық орталығы Алматы қалалық филиалының атқарған жұмыстары жайлы
2025 жылдың алғашқы жартыжылдығында Жол активтері сапасының ұлттық орталығы Алматы қалалық филиалы жол құрылысы мен жөндеу жұмыстарының сапасын бақылау бағытында ауқымды жұмыстар атқарды. Осы кезеңде филиал мамандары 217 рет тексеріске шығып, жол құрылысында қолданылған материалдар мен орындалған жұмыстардан 400 сынама алды.
Алайда алынған сынамалардың 164-і техникалық талаптарға сәйкес болмай шықты. Бұл — сапаны арттыру қажеттігін көрсететін маңызды көрсеткіш. Сонымен қатар тексеріс барысында 84 ақау тіркеліп, оның ішінде 41-і — өрескел, 31-і — маңызды, ал 12-сі маңызды емес ақау ретінде жіктелді.
Филиал директоры Мәулен Тоқтарбайұлы бұл жөнінде:
«Біздің мақсат — жолдардың сапасын арттыру арқылы қала тұрғындарының қауіпсіздігін қамтамасыз ету. Әрбір анықталған ақау – болашақтағы апаттың алдын алатын мүмкіндік», – дейді.
Сондай-ақ ол: «Анықталған кемшіліктер бойынша мердігер мекемелерге нақты ұсыныстар берілді. Жауаптыларға заң аясында тиісті шаралар қабылдануда», – деп атап өтті.
Жол сапасын бақылау – бір күндік емес, үздіксіз атқарылатын жүйелі жұмыс. Алматы қалалық филиалы алдағы уақытта да бұл бағыттағы талапты күшейтіп, жол инфрақұрылымының сапасына тұрақты мониторинг жүргізуді жалғастырады.