Алматыда 17–23 қараша аралығында жасөспірімдер (U-15, U-17) арасындағы тоғызқұмалақтан Әлем чемпионаты өтіп жатыр. Шара Алматыдағы «Зенит» спорт орталығында екінші рет ұйымдастырылып, ашылу салтанатына Алматы қаласы әкімдігі, Мәслихат, спорт басқармасы, қоғамдық кеңес, ҚР Тоғызқұмалақ спорты федерациясы, Дүниежүзілік федерация және шетелдік делегациялар қатысты, деп хабарлайды Tarazy ақпарат.
«Дүниежүзінен ондаған мемлекет қатысып отырған оқушылар арасындағы әлем чемпионаты тағы да жалауын көтеріп отыр. Біз бұл шараға атсалысқан барлық тоғызқұмалақ жанашырларына алғыс білдіреміз. Дүниежүзілік тоғызқұмалақ федерациясының президенті Әлихан Байменовтің сәлемін жеткіземін. Ол кісі үнемі айтады: тоғызқұмалақта жеңілетіндер, ұтылатындар болмайды. Ұтатын — тек ұлттық мүдде. Бұл ойынға әлемдік қызығушылық артты», – деп атап өтті Қазақстан Тоғызқұмалақ спорты федерациясының президенті Әкім Тұрсын.
Чемпионат классика (онлайн және офлайн), рапид және блиц форматында өтеді. Биыл жарысқа 21 мемлекеттен 180 жас спортшы қатысып, зияткерлік шеберліктерін сынайды. Қатысушылар ұлттық ойынды халықаралық деңгейде насихаттап, өз елдерінің намысын қорғайды.
Шараның басты мақсаты – тоғызқұмалақты әлемдік аренада кеңінен таныту, жас буынның интеллектуалдық қабілетін дамыту және халықаралық мәдени байланыстарды нығайту. Жарысты Алматы қаласы әкімдігі қолдап, ҚР Мәдениет және спорт министрлігі мен Халықаралық федерация ұйымдастырады. Демеушілер – KMF Банк және JET.
Жарыс жеңімпаздары мен жүлдегерлері кубоктар, медальдар мен дипломдармен марапатталады. Әлем чемпионатының жабылу салтанаты 22 қараша сағат 14:00-де өтеді.
