Атырау қаласы әкімдігінің алдында, Жайық өзенінің бойында заңсыз ойын автоматтары жұмыс істеп тұр. Бұл мәселені жергілікті блогер Рүстем Баязиев көтеріп, әлеуметтік желіде видео жариялады, деп хабарлайды Tarazy.kz
Блогердің айтуынша, балаларға арналған бұл аппараттарда үлкен ақша айналып жатыр.
“Ойыншық алу үшін аппаратқа 200 теңге саласың, бірақ темірі қыспайды. Яғни ойыншықты алу мүмкін емес. Көзге көрінбесе де, мұнда үлкен көлемде ақша айналып жатыр. Ал аппаратты қоюға ешқандай рұқсат қағазы жоқ. Кеше маған 100-ден аса ата-ана хабарласып, балалары осы автоматтарда бірашама ақша жоғалтқанын айтты. Біз енді баланы жылатпау үшін барымызды саламыз. Бұл аппараттар балаларды кішкентайынан азартқа үйрететін құралға айналып отыр”, – дейді Рүстем Баязиев.
Сондай-ақ ол ойын автоматтарының қалалық әкімдіктің дәл алдында тұрғанын сынға алды.
“Әкімдіктің алдында бір емес, бірнеше аппарат қойылған. Оны әкімдік қызметкерлері көрмеді дегенге сенбеймін. Бұл заңсыздыққа кім жауап береді? Әкімдік қайда қарап отыр? Не масқара мынау? Мұның артында кім тұр?” – деп шүйлікті блогер.
Блогердің айтуынша, Атырауда балалардың ойын-сауығына арналған нысандар тапшы. Сондықтан демалуға келген балалар амалсыздан ойын автоматтарына тартылады.
“Балалар ұтылып жыласа, ата-аналары да ақша жоғалтады. Қазіргі таңда полиция осы іс бойынша тексеру жұмыстарын жүргізіп жатыр”, – деді ол.
Сонымен қатар Баязиев ойын автоматтарының артында ықпалды адамдар тұрған болуы мүмкін екенін айтып, аппараттардың рұқсат қағаздарын тексеруді және олардың заңдылығын анықтауды талап етті.
