Мемлекет басшысы Қасым-Жомарт Тоқаев жуырда жарияланған «Қазақстан жаңғырудың жаңа кезеңіне қадам басты» атты сұхбатында Қазақстанның цифрлық державаға айналуы – уақыт талабы деп, жасанды интеллект пен цифрлық технологиялар ел дамуының құрамдас бөлігі ғана емес, ұлттық бәсекеге қабілеттіліктің берік негізі екенін айрықша атап өтті, деп хабарлайды Tarazy.kz
Қазіргі таңда цифрландыру экономика, мемлекеттік басқару және қоғам өмірінің барлық саласына терең еніп, ұлттық дамудың стратегиялық факторына айналып отыр.
Жетісу университеті тірек жоғары оқу орны ретінде өңірдегі білім берудің цифрлық экожүйесін қалыптастыруда жетекші рөл атқарады. Университетте еліміздің ғылыми-технологиялық әлеуетін арттыруға, сондай-ақ, еңбек нарығында сұранысқа ие IT және жасанды интеллект саласының білікті кадрларын даярлауға бағытталған кешенді жұмыстар жүзеге асырылуда.
Қазіргі таңда Жасанды интеллект бағыты бойынша 7 білім беру бағдарламасы жүзеге асырылып, онда 6805 студент оқыды. Huawei платформасында 6 000-нан астам, Coursera платформасы арқылы 7 427 тыңдаушы білім алды. Сонымен қатар 367 педагог жасанды интеллект саласы бойынша біліктілігін арттырды. Студенттер «Жас ғалым», «StartUp» бағдарламалары мен жалпыуниверситеттік конкурстар аясында жобалар әзірлеп, компьютерлік желілер, жасанды интеллект, виртуалды шындық, робототехника және мехатроника зертханаларында прототиптер жасайды.
Қазіргі таңда университетте 5 ЖИ-агент әзірленіп, енгізілді. Олар: «ZU Connect», «ZU AI Game Studio», «ZU Мультимедиа», «ZU Smart Zhetysu цифрлық платформасының көмекшісі» және «ZU Aurora» дауыстық көмекшісі. Алдағы уақытта «AI-Enabled University» тұжырымдамасы аясында жаңа ЖИ-агенттерді әзірлеу жоспарланып отыр.
Дарынды жастардың шығармашылық және техникалық әлеуетін дамыту мақсатында «AI-Sana Жетісу университеті студенттерінің көзқарасымен: үйренеміз, жасаймыз, болашақты өзгертеміз» тақырыбында конкурс жарияланды. Конкурстың мақсаты – студенттер арасында жасанды интеллект құралдарын кеңінен насихаттау, үздік жобаларды анықтап, қолдау көрсету.
Университетте әзірленген «Smart Zhetysu» цифрлық платформасы негізгі үдерістерді цифрландыруға, автоматтандыруға және оңтайландыруға бағытталған. Бұл платформа арқылы білім алушылар онлайн режимде жатақханадан орын алу, ауысу, апелляция, жазғы семестр, академиялық демалыс, оқудан шығару, бос білім беру гранттары конкурсына қатысу бойынша өтініш бере алады, сондай-ақ «one click» форматында түрлі анықтамалар алады.
Оқытушылар мен қызметкерлер үшін жеке кабинеттер, корпоративтік мессенджер, ғылыми қызметті жоспарлау және есепке алу құралдары қолжетімді. Электрондық кітапхана мен каталогқа еркін қол жеткізу қамтамасыз етілген. «Smart Zhetysu» платформасы үнемі жетілдіріліп отырады. Бұл көрсеткіштер жасанды интеллектіні меңгерудің айқын дәлелі.
Мемлекет басшысы Қасым-Жомарт Тоқаевтың тікелей бастамасымен 2026 жыл «Цифрландыру және жасанды интеллект жылы» деп жарияланды.
Бұл шешім еліміздің барлық саласында, соның ішінде білім мен ғылымда жасанды интеллект технологияларын кеңінен енгізуді жеделдетуге бағытталған маңызды қадам болып отыр.
Бұл тәжірибе еліміздегі университеттердің білім беру жүйесін жаңғыртып, студенттердің мүмкіндіктерін кеңейтіп, жоғары білімнің трансформациясына нақты серпін береді.
Жетісу университеті білім беру мен ғылымдағы белсенділігін арттырып, жасанды интеллект арқылы жоғары білімнің жаңа дәуіріне жол салуда.
