«ҚазАвтоЖол» ұлттық компаниясы жол жабынында ақаулар анықталғандықтан, уақытша ақы алынбайтын республикалық маңызы бар автожолдар тізімін жариялады, деп хабарлайды Tarazy.kz
Компания мәліметінше, 2025 жылғы 15 қыркүйектен бастап республикалық маңызы бар ақылы жолдарда төлем алу тәртібі өзгертілген. Жаңа ережеге сәйкес, қозғалыс қауіпсіздігі мен жүргізу жайлылығына кедергі келтіретін ақауы бар жол учаскелері үшін жүргізушілерден ақы алынбайды.
«Бұл шешім Автомобиль жолдары комитетімен келісілді. Қазіргі таңда дефект анықталған жол жабынының жалпы аумағы шамамен 1,1 млн шаршы метрді құрайды. Мақсат – жолдарды нормативке сай келтіру және жүргізушілер үшін қауіпсіз әрі қолайлы жағдай жасау», – делінген хабарламада.
Аталған учаскелерде төлем 29 қаңтардан бастап және барлық ақаулар толық жойылғанға дейін алынбайды. Жөндеу жұмыстары техника дайындығына және ауа райының қолайлы болуына қарай кезең-кезеңімен жүргізіледі.
Қазіргі уақытта ақы алынбайтын жол учаскелері:
- Көкшетау – Петропавл
- Павлодар – Семей – Қалбатау
- Павлодар – Омбы
- Астана – Теміртау
- Алматы – Қонаев
- Қонаев – Талдықорған
- Шымкент – Қызылорда
- Орал – Самара
- Орал – Саратов
- Астана – Павлодар
- Қызылорда – Арал
- Ақтөбе – Орынбор
- Қостанай – Троицк
- Тараз – Қайнар
«ҚазАвтоЖол» өкілдері жол қозғалысына шықпас бұрын жүргізушілерге өз бағыты бойынша ақылы учаскелердің жағдайын алдын ала тексеруге кеңес береді.
