Әлеуметтік желілерде «әскерден қалдыру» немесе «ақ билет» алып беру қызметін ұсынатын жарнамалар тарауда. Осыған байланысты ҚР Қорғаныс министрлігі мерзімді әскери қызметке шақыруды кейінге қалдыру немесе одан босату туралы шешім тек заңнамаға сәйкес шақыру комиссиясы арқылы қабылданатынын мәлімдеді, деп хабарлайды Tarazy.kz
Ведомствоның түсіндіруінше, әскерге шақыру мәселелері бойынша заңгерлік кеңес беру – заңды қызмет. Алайда медициналық құжаттарды қолдан жасау, жалған диагноз рәсімдеу немесе әскери қызметтен жалтарудың өзге де тәсілдерін ұсыну – қылмыстық құқықбұзушылық. Мұндай әрекеттер делдалдарға да, шақырылушылардың өздеріне де қылмыстық жауапкершілік жүктейді.
Министрлік азаматтарды күмәнді делдалдардың қызметіне жүгінбеуге шақырды. Әсіресе өзін «әскери комиссариаттың көмекшісі» ретінде таныстырып, мәселені шешіп беруге кепілдік беретін адамдардың әрекеті заңсыз екені ескертілді. Әскерге шақыру рәсімдері тек жергілікті әскери басқару органдары мен медициналық комиссиялар арқылы жүзеге асырылады.
Қорғаныс министрлігінің мәліметінше, мерзімді әскери қызметті өткеру – әр азаматтың конституциялық борышы. Сонымен қатар қызмет барысында және босатылғаннан кейін екі ай ішінде әскери қызметшілерге несиелік каникул қарастырылған. Белгіленген мерзімді толық өтеген азаматтарға білім беру жеңілдіктері ұсынылады. Атап айтқанда, жоғары оқу орнына ҰБТ тапсырмай-ақ білім беру грантын алу мүмкіндігі бар, сондай-ақ студенттік жатақханадан орын алуға басым құқық беріледі. Бүгінге дейін елімізде 9 мыңнан астам азаматқа тегін білім алуға сертификат табысталған.
Азаматтарды мерзімді әскери қызметке шақыру Қазақстан Республикасы Президентінің жарлықтары мен қолданыстағы заңнамаға сәйкес жылына екі рет – наурыз-маусым және қыркүйек-желтоқсан айларында жүргізіледі. 18 бен 27 жас аралығындағы, кейінге қалдыру немесе босату құқығы жоқ ер азаматтар әскерге шақырылады.
Министрлік азаматтарды өз құқықтарын тек заңды тетіктер арқылы жүзеге асыруға және заңсыз ұсыныстардан сақ болуға үндеді.
