Қазақстанда бүгіннен бастап Әкімшілік құқық бұзушылық туралы кодекске енгізілген өзгерістер күшіне енді. Енді кейбір құқықбұзушылықтар полиция қызметкерлерінің қатысуынсыз-ақ, цифрлық жүйе мен «ақылды камералар» арқылы автоматты түрде тіркеліп, айыппұл рәсімделеді, деп хабарлайды Tarazy.kz
Бұған дейін бейнебақылау камералары негізінен көлік жылдамдығын асыру, бағдаршамның қызыл түсіне өту немесе жол белгілерін бұзу сияқты құқықбұзушылықтарды ғана анықтайтын. Ал жаңа өзгерістерге сәйкес, цифрлық жүйе енді басқа да бірқатар тәртіп бұзушылықтарды тіркеп, айыппұл салуға мүмкіндік береді.
Мәселен, жүргізушілер рөлде отырып телефон қолданса, қауіпсіздік белдігін тақпаса, көліктің жарық шамдарын дұрыс пайдаланбаса немесе жол қозғалысына кедергі келтірсе, жүйе мұндай әрекеттерді автоматты түрде тіркейді. Сондай-ақ техбайқаудың мерзімі өтіп кетсе немесе сақтандыру полисі болмаса, ақпараттық база арқылы бұл да бірден анықталып, айыппұл рәсімделуі мүмкін.
Сонымен қатар жаяу жүргіншілер де жауапкершіліктен тыс қалмайды. Камералар жолды белгіленбеген жерден кесіп өткендерді, көшеге қоқыс немесе темекі тұқылын тастағандарды, тыйым салынған жерде темекі шеккендерді тіркеуі мүмкін. Бұдан бөлек, алкоголь өнімдерін белгіленбеген уақытта сату фактілері де бақылауға алынуы ықтимал.
Жүйе адамның бет-әлпетін немесе көлік нөмірін тану арқылы деректер базасымен сәйкестендіреді. Егер құқықбұзушылық расталса, хаттама толтырылмай-ақ айыппұл автоматты түрде тіркеліп, азаматтың телефонына хабарлама жіберіледі.
