Respublica партиясының төрағасы Айдарбек Қожаназаровтың Абай Құнанбайұлы туралы айтқан пікірі әлеуметтік желіде қызу талқыланып жатыр, деп хабарлайды Tarazy.kz
Қожаназаров Абайдың ұлы ақын болып қалыптасуына әкесінің дәулеті мүмкіндік бергенін айтып, осы ойды кәсіпкерлерді қолдаудың маңызымен байланыстырған.
“Абайды Абай қылған – Құнанбайдың малы. Егер Құнанбайдың малы болмаса, Абай Абай болмайтын еді. Себебі уақыты болмай, қой бағып кететін еді. Сондықтан біздің партия Құнанбайлардың саны көп болсын деп, оларды қолдайды. Құнанбайлар неғұрлым көп болса, елімізде Абайлар да соғұрлым көп болады”, — дейді ол.
Алайда партия төрағасының бұл пікірі әлеуметтік желі қолданушыларының сынына ұшырады. Желіде оның Абайдың тұлға ретінде қалыптасуын Құнанбайдың дәулетімен байланыстыруын орынсыз деп бағалаған пікірлер тарады. Кейбір қолданушылар Қожаназаровтың сөзін ұлы ақынның мұрасы мен тұлғасына құрметсіздік деп қабылдап, одан көпшілік алдында түсініктеме беруді, тіпті кешірім сұрауды талап етіп жатыр.
“Не дейік, ұлы ақынның өз сөзімен айтсам: “бетті бастым, қатты састым, тұра қаштым, жалма-жан”, — деп жазған фб белсендісі Арман Сқабылұлы.
