Қазақстанда сегіз инвестициялық жоба аясында 494 атаудағы дәрілік препарат өндіру жоспарланып отыр. Жобалардың жалпы құны 862 млн долларды құрайды. Бұл туралы Үкімет отырысында Денсаулық сақтау министрі Ақмарал Әлназарова мәлімдеді, деп хабарлайды Tarazy.kz
Министрдің айтуынша, жобаларды жүзеге асыру нәтижесінде 1,2 мыңнан астам жұмыс орны ашылады. Алғашқы 300 дәрі-дәрмек түрін 2027–2030 жылдары кезең-кезеңімен өндіріске енгізу көзделген.
Отандық фармацевтика өнеркәсібінде де өсім байқалады. 2025 жылдың қорытындысы бойынша қазақстандық дәрі-дәрмек өндірісі 37%-ға артқан. Ал 2026 жылдың алғашқы сегіз айында 157 млрд теңгенің өнімі шығарылды. Бұл өткен жылдың сәйкес кезеңімен салыстырғанда 30%-ға жоғары.
Соңғы екі жылда фармацевтика саласына салынған инвестиция көлемі 3,3 есе, ал экспорт 1,9 есе өскен. Қазақстандық дәрілік препараттар Ресей, Қырғызстан, Өзбекстан, Моңғолия және Молдоваға жеткізіледі.
Отандық өнімнің шетел нарығына шығуының бір мысалы ретінде Шымкентте өндірілген қант диабетіне қарсы препараттың алғашқы партиясын Болгарияға жеткізу аталды.
Министрлік фармацевтикалық өндірісті одан әрі дамыту үшін өндірушілермен ұзақмерзімді келісімшарттарды кеңейтіп, отандық өнімді сатып алу тетіктерін жетілдіруді жоспарлап отыр. Бұл шаралар елдегі дәрі-дәрмек өндірісін ұлғайтуға және отандық препараттардың түр-түрін көбейтуге бағытталған.
