Израиль үкіметі премьер-министр Биньямин Нетаньяху қаза тапты деген ақпаратты жоққа шығарып, оның шындыққа жанаспайтынын ресми түрде мәлімдеді, деп хабарлайды Tarazy.kz
“Бұл – фейк жаңалық. Премьер-министрдің жағдайы жақсы”, – деді Премьер-министр кеңсесінің баспасөз хатшысы Омер Достри.
Айта кетейік, кейінгі күндері әлеуметтік желілерде Нетаньяху Иранның жауап соққысынан қаза тапты деген қауесет кең тарады. Мұндай әңгімелердің шығуына 13 наурыз күні өткен онлайн-баспасөз конференциясы кезінде Израильде әуе шабуылы туралы дабыл сиренасы қосылғанымен, оның конференция өткен жерде естілмеуі себеп болған.
Сонымен қатар әлеуметтік желілерде аталған баспасөз мәслихатына қатысты делінген видеолар тараған. Кейбір сарапшылар бұл видеолардың жасанды интеллект көмегімен жасалған болуы мүмкін екенін айтқан. Осындай материалдардың таралуы Нетаньяху қаза тапты деген қауесеттің күшеюіне себеп болған.
Бұдан бөлек, желіде Ресей, Қытай және Солтүстік Кореямен байланысы бар делінген кейбір аккаунттар “Нетаньяхудың өлімі расталды” деген жазбалар жариялаған.
Сондай-ақ желіде “Нетаньяху қайтыс болды” деген жазуы бар түрлі скриншот та тарап, қызу талқыға түсті.
Алайда Израиль премьер-министрінің кеңсесі бұл мәліметтердің барлығы шындыққа сәйкес келмейтінін мәлімдеді. Кеңсенің әлеуметтік желідегі парақшасында жарияланған хабарламада азаматтарды тек ресми әрі тексерілген ақпаратқа сенуге шақырған.
Онда премьер-министрдің қызметін жалғастырып жатқаны және ел қауіпсіздігіне қатысты жұмыстарды жүргізіп отырғаны айтылған.
